طارق الشناوي عن "مرعي البريمو":" الوهج اللي عند هنيدي اتكسر ولازم يشتغل مع كريم وعز"

كتبت- شهد القاضي:

كشف الناقد الفني طارق الشناوي عن رأيه في فيلم "مرعي البريمو"، الذي يعرض حاليا بدور العرض السينمائي.

وقال من خلال لقائه ببرنامج ET بالعربي: " لازم هنيدي يغير السيستم، ويفكر يشتغل في فيلم يكون معاه مثلا كريم عبد العزيز أو أحمد عز، يروح في دايرة أدوار تانية، لكن إن هو يبقى البطل المحوري كل ده، ورقة وانتهت، إلعب بقى في سكة تانية واعمل عمل فني تكون فيه إنت أحد الأبطال ومش شرط تكون البطل الأول بالمناسبة، إذا راح في السكة دي ممكن يكون عنده زمن قادم يشتغل فيه".

وأضاف: "هو وعد جمهوره وزود قوي سقف التوقعات، فالواقع كان هزيلا مفيش فيه شئ جديد ولا مختلف ولا منطقي.. سعيد حامد مخرج مهم وبدأو معاه من "صعيدي في الجامعة الأمريكية" كان قفزة جماهيرية، إيه اللي حصل؟.. تراجع".

واستكمل: "الفيلم في أسوأ حالات الكاتب والمخرج وطبعا النجم، العناصر كلها مجتمعة وأدت للفشل الذريع ده، هنيدي بيخش الفيلم وعنده قناعة إن الناس هتضحك، بس الجمهور معادش بيضحك على اللي كان بيضحكه قبل كده ومعادش هنيدي هو هنيدي اللي قبل كده.. والوهج الداخلي اللي عند هنيدي انكسر".

وأردف: "ومش بس الفيلم ده، يعني قبل كده "نبيل الجميل أخصائي تجميل" نفس الكارثة بس الكارثة المرة دي أكتر، ونفس الحكاية بتعتقد إن الناس هتضحك والإفيهات هتجيب مفيش حاجة بتجيب".

واختتم حديثه، قائلا: "بقية الممثلين في أسوأ حالتهم، غادة بتعمل إيه؟ كأنها مش موجودة.. ولا حاجة، علاء مرسي؟ متشوفوهوش، هو نفسه تبرأ أو أوحى بأنه حزين على اشتراكه في فيلم مكانش هو موجود فيه".

فيلم "مرعي البريمو" فكرة محمد هنيدي، سيناريو وحوار إيهاب بليبل، إخراج سعيد حامد، بطولة محمد هنيدي، غادة عادل، محمد محمود، علاء مرسي، أحمد بدير، لطفي لبيب، مصطفى أبو سريع، نانسي صلاح، إنجي علي.