بالفيديو- 3 مشاهد يتداولها مستخدمو "فيسبوك" لتذكرهم بـ"الحب اللي كان"

كتبت- منى الموجي:

يتداول مستخدمو مواقع التواصل الاجتماعي، عدد من أشهر مشاهد الأفلام والمسلسلات عبر صفحاتهم وحساباتهم الشخصية، والتي يصفونها بأجمل المشاهد الرومانسية، وبأن حوارها من أجمل ما كُتب عن "الحب اللي كان"، مؤكدين أن الرومانسية بمفهوم أفلام ومسلسلات زمان، لم تعد موجودة في الحاضر الذي نحياه..

الباب المفتوح

فيلم "الباب المفتوح" من كلاسيكيات السينما المصرية، يتداوله عدد كبير من مستخدمي موقع "فيسبوك"، وينشرون صور من مشاهده، ويقتبسون أشهر الجمل التي جاءت على لسان أبطاله.

ومن بين أشهر المشاهد التي يعيدون نشرها من الفيلم:

حسين : لسه مخاصماني.. ما هو حاجة من الاتنين يا مخاصماني يا خايفة مني

ليلى: وهخاف من ايه

حسين: سؤال وجيه.. الواحد بيخاف من شخص تاني ليه.. إما إن الشخص ده مؤذي أو خايف يحبه

ليلى: أنا عمري ما هحب حد

حسين: متأكدة

ليلى: طبعا متأكدة

حسين: أنا شخصيا مش متأكد

ليلى: قصدك ايه

حسين: قصدي انك هتحبيني هتحبيني اوي.. هتصحي يوم الصبح وهتكتشفي انك بتحبيني

فاتن حمامة وصالح سليم في مشهد من فيلم "الباب المفتوح"..

حبيبي دائما

من أشهر الأفلام الرومانسية في تاريخ السينما المصرية، فيلم "حبيبي دائما"، بطولة الفنان نور الشريف والفنانة بوسي، ويحكي قصة حب بين شاب يُدعى "إبراهيم" يعمل طبيب، وفتاة اسمها "فريدة" تنتمي لعائلة ارستقراطية تخطط عائلتها لزواجها من رجل يضمن لابنتهم أن تحيا في نفس مستواها المادي والاجتماعي، فيرفضون ارتباطها بـ"إبراهيم".

ومن بين أكثر المشاهد التي يتداولها رواد مواقع التواصل، مشهد تتحدث فيه فريدة عن الشبه الكبير بينها وبين حبيبها، ليس في الشكل ولكن في الروح..

مشهد خارجي، في ضوء الشمس الساطعة، خلفيته مياه النيل يحيطها الزرع، وحبيبان ينظران لمستقبلهما بعيون لامعة، تنتظر الغد ليحقق لهما حلم التقاء لا يعرف الانفصال، تقدم فريدة لإبراهيم خاتم كان يملكه جدها، يشبه دبلة الخطوبة، وتندهش أنه يناسبه تماما وكأن جدها كان يفكر فيه عندما اشترى هذا الخاتم، لتعلن له أنها تخطبه رسمي، فمن يحب الثاني أكثر يُقدم على الخطوة الأولى.

فريدة: انت أنا وأنا انت، أقولك حاجة غريبة، تصور إن ممرضة في المستشفى اكتشفت إننا نشبه بعض.

إبراهيم: معقول بقى أنا حلو ومسمسم كدا.

فريدة: الشبه مش تقاطيع وملامح، إنما تعبير وروح واحساس، وانت ساكن جوا روحي، بشوف الدنيا بعينيك ببتسم بشفايفك، بتكلم بطريقتك بمشي بخطواتك.

ابراهيم: وبعدين هتخليني اتغر.

فريدة: اتغر أوي يا حبيبي عشان نبقى زي بعض، أنا كمان مغرورة أوي.

إبراهيم: بس أنا مبحبش المغرورين.

فريدة: أنا مغرورة بيك مش عليك.

أبو العلا البشري

واحد من أكثر المشاهد التي يعيد رواد مواقع التواصل الاجتماعي نشرها عبر صفحاتهم الشخصية، للحديث عن الحب والرومانسية، والفرق بين الحب قديما وبين الحب في زمن "التيك أواي"، هو مشهد من مسلسل "أبو العلا البشري"، يجمع بين الفنانة نسرين، والفنان الكبير محمود مرسي الذي كان يحمل لقب "راهب الفن"، قبل زواجه من الفنانة سميحة أيوب.

يصف الجمهور المشهد بأنه أحد أجمل المشاهد، التي كُتبت عن الحب، كتبه الكاتب الكبير أسامة أنور عكاشة، وأخرجه المخرج محمد فاضل، وساعدتهما الموسيقى التصويرية مع التصوير وأداء مرسي، في خلق أجواء مفعمة بالرومانسية.

يقول الحوار..

أبو العلا البشري (محمود مرسي): الحب النهاردة صابه اللي صاب الدنيا والناس والأخلاق، مبقاش أبدا زي الحب بتاع زمان

نجوى (نسرين): أيام ما كانت الـ3 بيضات بتعريفة ورطل اللحمة بقرش.

أبو العلا: لا يا نجوى.. أنا بتكلم جد

نجوى: أنا آسفة يا عمي

أبو العلا: أنا بتكلم عن الحب المثالي بعذريته برومانسيته بلمسة الطهر اللي فيه بروح الشاعرية اللي جواه.. زمان كنا بنحب زي ما نقرا الشعر أو نسمع مزيكا أو نتفرج على لوحات ناجي وصبري ومحمود سعيد.. كانت لمسة من الايد.. مجرد لمسة تغيبنا عن الوجدان.. كانت نظرة من العين تسهرنا للفجر.. وكانت رعشة الكلمة الحلوة على الشفايف تبكينا..

تصوري احنا كنا بنخاف من القرب أكثر ما نخاف من البعد.. وفي البعد طبعا نرجع نحن للقرب تاني.. كانت الأشياء البسيطة جدا في الحياة بيبقى ليها قيمة كبيرة أوي .. وشوشة الريح في الشجر.. نور القمر في المكان حوالينا.. كل حاجة كان بيبقى ليها معنى وطعم ومتعة.. أغاني أم كلثوم كنا نقعد نسمعها بالساعات ومنتكلمش خالص.. وفي نفس الوقت كنا بنقول كل حاجة.. عشان كدا الحب كان بيفضل وبيعيش مهما فصلت بين المحبين بلاد وفرقت بينهم جبال حتى..

نجوى: حضرتك بتقول كلام عمري في حياتي ما سمعت أحلى منه

أبو العلا: مع ذلك الكلام ده كله مبيعبرش أبدا عن التجربة الحقيقية اللي احنا عشناها

نجوى: ليه احنا كمان منعشهاش

أبو العلا: لأنكم شيلتم الفواصل.. كسرتوا الأسوار.. واختصرتوا المسافات.. اتحول الحب لاتفاق سريع مباشر كل حاجة فيه سهلة.. مقابلة وتلامس واندماج.. مبقاش فيه حاجة غالية ولا عزيزة أبدا.. مبقاش يستحق حتى المحاولة.. بقى زي ساندوتش تاكلوه وانتم ماشيين في السكة وتهضموه قبل ما توصلوا.. لما الحب بيبقى صعب بيكبر وبيعيش.

مشهد من مسلسل "أبو العلا البشري" عن معنى الحب المثالي..