دنيا سمير غانم: آه من شوك الشائعات!

كتب- محمد رفعت:
نفت الفنانة الشابة دنيا سمير غانم الشائعات التي ترددت حول زواجها من نجم الكوميديا أحمد مكي، بعد تألقهما في أكثر من عمل معا، آخرها الجزء الثاني من مسلسل ''الكبير قوي''، مؤكدة في نفس الوقت أن علاقتها بشقيقتها إيمي سمن على عسل، بعكس ما أشيع أيضا عن وجود خلافات بينهما.

وقالت دنيا في صفحتها على الفيسبوك:'' الحياة مليانة ورد وشوك، مش صح ولا ايه.. بس النهاردة عاوزة أكلمكم شوية عن شوك الشائعات.. بصراحة أكثر.. الفن لا يعطي خصوصية لحياة صاحبه.. ومنذ أن بدأت التمثيل أجد نفسي أسير وتسير الشائعات من خلفي.. والكلام ده ينطبق على بنات جيلي من الممثلات.. والغريب إن أي إشاعة من شأنها أن يصدقها الناس عنا حتى ولو لم يكن لها أي أساس من الصحة، لكني بطبيعة الحال أصبحت محصنة ضد التأثر بهذه الإشاعات وأكثر صلابة تجاهها''.

وأضافت دنيا ''أعترف بأنني كنت أنزعج بشدة في البداية، وأحبس نفسي داخل غرفتي، وأظل أبكي لساعات طويلة.. لكن فوجئت بوالدي ذات مرة يقول لي: إذا أردت العمل في الفن، فأنت عرضة لمثل هذه التفاهات، وكلما زاد نجاحك زادت الشائعات حولك وهذه ضريبة النجاح .. وطبعاً لطالما كنت ضحية لإشاعات الحب والزواج التي تطاردني كثيرا وربطتني الإشاعات بأكثر من شخص في الوسط الفني لكنني أؤكد أنني عندما أحب سأعلن ذلك للجميع ولن أخفيه فالحب ليس جريمة حتى نخفيه''.

وعن علاقتها بإيمي، قالت: ''ساعات كتير بحس إن أنا وإيمي أختي مش مجرد أختين اتولدوا من بطن واحدة ولا مجرد اسمين بيربطهم اسم أب واحد في البطاقة.. أنا بحس إنها كل حاجة في حياتي.. أقول لكم على سر.. أنا ساعات بخاف عليها وبحسها بنتي بالضبط.. إحنا دايما بنتعامل أنا وهي وكأننا أصحاب يعني مفيش أسرار بنخبيها عن بعض وإحنا متعودين على ده من صغرنا.. ماما كانت دايماً تقول لنا إنتوا مالكوش غير بعض ولازم تبقوا أصحاب مش مجرد أخوات وبس''.

وتابعت ''أنا ساعات كتير بسيب غرفتي وأروح أنام جنبها لأني بحس إني مش خايفة من أي حاجة وأنا في حضنها وبسأل نفسي كتير أنا ليه بحس كده ناحية إيمي وبتكون الإجابة إن احتمال علشان سننا متقارب أوي وتفكيرنا تقريباً واحد.. وعلى فكرة أنا أكتر حاجة بحبها في إيمي إن دمها خفيف موووت وبتفضل تضحكنا وبتموتنا من الضحك لما بنخرج مع أصحابنا''.

وعن هواياتها الأخرى غير التمثيل والغناء..قالت دنيا سمير غانم: ''أنا فعلاً بحب الشعر وبحاول دايماً أختلس ولو دقايق من وقتي علشان أقرا فيهم أشعار تصفي ذهني.. بنسى نفسي بالذات لما بقرا أشعار نزار قباني لأني بشوف إنه الشاعر الوحيد تقريباً اللي رفع مكانة المرأة أوي وأنا بصفة عامة بحترم الرجل اللي يحترم المرأة ويقدر فيها عقلها وذكاءها وروحها الطيبة مش بس مجرد شكلها وجسدها''.

وأكملت ''هي دي أكتر لحظات بحب أقضيها مع نفسي.. لأني زي ما قلت بميل أكتر للهدوء وبفضل أكون بعيدة عن أي دوشة وصخب. حرجع تاني وأكتب لكم بعد كام يوم كده لما يعدي الويك إند ده''.

اقرأ أيضا:

دنيا سمير غانم: محاكمة مبارك جعلتني أشعر بعظمة الثورة