نجل فؤاد المهندس: شويكار كانت في مكانة أمي

كتب- حسن مرسي:

أكد محمد فؤاد المهندس، نجل الفنان فؤاد المهندس، أن الفنانة شويكار كانت سيدة عظيمة، ولا يوجد كلام يمكن أن يقال في حقها بعد ما قالته شقيقته منة الله في حق الفنانة شويكار، وقال: "كنت دايما بناديها أقولها يا طنط شوشو، واتصدمت صدمة كبيرة في موتها، وعمرنا ما سمعناها بتتألم نهائي كانت بتخفي آلامها".

وأضاف خلال مداخلة هاتفية مع الإعلامي وائل الإبراشي ببرنامج "التاسعة" المُذاع عبر القناة الأولى المصرية: "فؤاد المهندس وشويكار اتفقوا على اتفاق أنهم يبروا ولادهم التلاتة زي بعض، ومفيش فرق بيننا وعمرنا ما حسبناها مين والده مين، لأن كان في حالة حب شديدة بيننا وبين بعض وهما ربونا على كدة ومينفعش كانوا يخرجوا من غير الولاد التلاتة".

وقال: "أنا مرة كنت عاوز أسافر اليونان وقولت لوالدي عاوز أسافر رفض، فروحت مباشرة لماما شوشو قولتلها أقنعيه، وقدرت تقنعه، وقبل ما أسافر خدوا رأي أخواتي الاثنين منة وأحمد، وفي الأيام الأخيرة له شويكار كانت كل يوم معاه، وكانت بتجيبله الأكل اللي بيحبه".