"عايز آكل عيش".. حمو بيكا يعتذر ويبرر تهديده "الموسيقيين"

كتب- محمد جمعة:

اعتذر مطرب المهرجانات حمو بيكا، عن الفيديو الذي توعَّد فيه نقابة الموسيقيين بالتظاهر والتكسير، عقب رفض منحه "كارنيه دي جي".

وقال بيكا، خلال مداخلة هاتفية مع برنامج "آخر النهار"، مساء اليوم الإثنين: "نقيب الموسيقيين هاني شاكر، على دماغي، وماقصدتش أبدًا أهينه.. أنا ابن ناس ومتربِّي، واللي حصل ده كان في ساعة غضب، وأنا لا بتاع تكسير ولا تظاهر ولا حاجة، وواقف مع بلدي لحد آخر يوم في عمري".

وأضاف مطرب المهرجانات: "أنا صوتي مش حلو، بس بأدِّي مهرجانات، وليَّ جمهور بيحبِّني ومشاهدات بالملايين على (يوتيوب)، والنقابة كل شوية تطلع لي بقرار وقف حفلات، رغم أن زملائي شغالين ومعاهم كارنيه من النقابة، حتى إن واحد قال لي عليَّ الطلاق طول منا موجود في النقابة ما هتمسك مايك وتغني".

وطالب بيكا نقابة الموسيقيين بإنشاء شعبة لمطربي المهرجانات، متابعًا: "عايزين نشتغل تحت جناح النقابة، وناكل عيش بشكل قانوني؛ لأن أنا كافحت واشتغلت نجار وجزار، لحد ما ربنا كرمني ووصلت للّي أنا فيه".

وتابع مطرب المهرجانات: "أنا قابلت الأستاذ هاني شاكر قبل كده، وقال لي إنت شكلك محترم، ومضيت له إقرار، وقال للنقابة إدولوا الكارنيه؛ لكنهم رفضوا".

وعن زيارته إلى مستشفى سرطان الأطفال 57357، قال بيكا: "أنا رُحت؛ لكن لم أغنِّ، وهمَّ اللي شغَّلوا الأغاني بتاعتي".

يُذكر أن مطرب المهرجانات حمو بيكا، نشر فيديو من داخل نقابة الموسيقيين، بعد رفض منحه "كارنيه دي جي"، وهدَّد فيه النقابة ومسؤوليها بالتظاهر ضدهم وتكسريها، وتهكم على فن نقيب الموسيقيين هاني شاكر؛ مما أثار الغضب على مواقع التواصل الاجتماعي، حتى تقدم محام ببلاغ إلى النائب العام يتهم فيه بيكا بالدعوة إلى التظاهر وضرب استقرار البلاد.