رحاب هاني تكتب: الملعب!

بقلم- رحاب هاني:

عارف الفرق أما تكون بتلعب ماتش كورة جوه الملعب و اما تكون مشاهد عادي بتتفرج عالتلفزيون !

في الاختيار الثاني بتشوف الملعب كله bird eye زي ما احنا فاعلام بنقول فبتكون عارف الفجوات و فين و ازاي تجري عشان تجيب و تعيب عاللاعب انه مش قادر يشوف الا انت شايفه مع انه فالحقيقة له كامل الحق ؛ هو فقلب الحدث ماعندوش الرؤية الكاملة الا عندك !

نفس الفكرة مع الا بيحصلنا كل يوم من احداث من فرط تشابهها تحس كأنك اتشفطت ففيلم Déjà Vu !

فاما تحاول تطلع بره الحدث ، بره الأحداث و تبص علي الدنيا من بره !

تجد مصر الان بتواجه خطر حقيقي ، خطر جماعة ارهابية و ده مش انا بلقي التهم و لا بوزع مسميات علي مزاجي ؛ لكن بما ارتكبته جماعة الاخوان المسلمين من أفعال و جرائم من ايام ما كان مرسي فالحكم من احداث الاتحادية و المقدم و غيرها و غيرها ، هي جماعة ارهابية باقتدار !

يوم ٣٠-٦ انا كتبت ماتفتكروش يا جماعة ان حلم ٨٠ سنة هننهيه احنا في أسبوع .. مستحيل !

و عليه و من ساعتها كل يوم بيقع شهداء من هنا و من هنا و الخطر الأكبر علي الحدود من مجندين مانعرفش أسمائهم بيقعوا زي العصافير من خلال عمليات ممنهجة اقل ما توصف به انها عمليات ارهابية وش !

ده جنب ، قوم ايه ... عندك حكومة قررت تقلش و تعمل قانون للتظاهر ... و كمبدأ مش عيب علي فكرة دول العالم الحرة كلها عندهم قانون للتظاهر ده آلية للحفاظ علي النظام و السلم العام -مش كلام مطاط لكن ادخل اعمل بحث كده عن اي دولة من دول الحريات و اعرف قانونها شكله ايه - لكن الحكومة حبت تحط التاتش بتاعها و قامت عملت قانون في بعض مواده ''كارثية'' !

و عشان كده من يحاربون من احل الحرية قرروا يتظاهروا -و هما عندهم حق- لكن الأزمة يا صديقي ان انت عندك جانب اخر مش طايقك و لا بيحبك هو الود وده ينفوخك لأنك كنت انت السبب في الإطاحة بنظامة ... قرر يعصر علي نفسه ''ليمونة'' و ينتهزها فرصة و يركب ''الموجة'' و ينزل معاك عشان تبقوا عدد ... مش لازم شعاراتهم بس المهم انها مظاهرة يعني ده انقلاب و مرسي لازم يرجع !!!!

و بقت سمك لبن تمر هندي و جه اليوم الا فيه الإخواني الا كان ماسك شومه و داخل يموتني في الاتحادية و هو بيقول الله اكبر واقف جنبي و قال ايه بيهتف يسقط حكم العسكر !

و تلاقي ده يقولك ''دي بتاعتي'' و التاني يرد ''لا دي بتاعتي انا'' !

و الأجمل بقي و الاصيع ان الاتنين ناسيين الجزء الثالث من المعادلة !

ناسيين اهم جزء ... الجزء الا بيحرك اللعبة كلها وقت ما يكون هو عايز و خاصة في المراحل المفصلية ......

الشعب !

اينعم ؛ احنا ناسين الشعب ، هذا الكائن الهلامي الا الكل بيتكلم بأسمه و ماحدش فالحقيقة بيمثله ..... انت بتتكلم عن الحرية و هو عايز العيش .... انت بتقول يسقط الانقلاب و هو عايز الأنبوبة .... انت بتقول يسقط قانون التظاهر و هو أصلا ماقراش قانون التظاهر بس معاه عشان الحال الا واقف و الخوف الا عايشه بسبب المظاهرات !

انت ناسي الجزء الثالث ؛ ناسيه لدرجة ان الواحد بدأ يخاف انه فلحظة يقوم عليك و عليه ....

و الشعب ده للاسف مجبور لانه دايما بين اختيارين يمثلوا ''السئ و الأسوأ'' !

و بعدين ترجع تلومه و تقول ''يا كلاب بتتفرجوا عال اعتصام و هو بينفض و الناس بتموت و مش فارق معاكم '' !

''شايفين شباب زي الورد بيقع و كمان ايه جوه الجامعة و ماتتحركوش'' !

فتلاقي الرد : الا فالاعتصام يستاهلوا و معاهم سلاح و الطلبة ؛ الاخوان هما الا قتلوهم '' !

ما انت كمان ماينفعش تحقن الناس بهذا الكم المهول من القتل و بعدين تقولهم انتوا ما بتحسوش ؟!

الخلاصة اذ أردتم : اعتقد اننا في أمس الحاجة اننا و لو حتي لدقائق نطلع من الملعب و نبص علي شاشة التليفزيون عشان نشوفه long-shot و نقدر نحكم ...بس !

رحاب هاني أستاذ مساعد بكلية الإعلام جامعة القاهرة

الأراء الواردة في المقال تعبر عن الكاتب وليس بالضرورة موقع مصراوي

 

 

لمتابعة أهم وأحدث الأخبار اشترك الآن في خدمة مصراوي للرسائل القصيرةللاشتراك...اضغط هنا