"كنت بهزر".. أحمد موسى عن منتقدي تصريحاته بعد صورة صلاح وجوارديولا

كتب- محمد أبوالمجد:

علق الإعلامي أحمد موسى، على صورة محمد صلاح مع بيب جوارديولا مدرب مانشستر سيتي، عقب انتهاء اللقاء بين ليفربول ومانشستر سيتي في الدوري الإنجليزي، والتي فاز بها ليفربول بهدف نظيف للفرعون المصري، قائلًا: "امبارح بعد الماتش جوارديولا راح لصلاح وبدأوا يوشوشوا بعض وأنا كنت بهزر لما قلت إن صلاح بيقوله تحيا مصر، وأنا كنت بهزر، هو حد سامع الحوار".

وأضاف "موسى" في خلال تقديمه لبرنامجه "على مسئوليتي" على فضائية "صدى البلد" مساء الاثنين: "إمبارح خدوا كلامي وقالوا شوف أحمد موسى بيقول إيه، طب هو أنتوا بتضايقكوا تحيا مصر، طب تحيا مصر تحيا مصر تحيا مصر، مليون تريليون مرة تحيا مصر لو كانت بتضايقكم".

وتابع: "قالوا أحمد موسى بيقول تحيا مصر، زعلان إني بقول كده طيب أشرب من البحرين والمحيطات لو مدايق من كده، ودايما تحيا مصر وتعيش مصر وتحيا بلادي العظيمة"، موضحًا: "هو انتوا بتزعلوا عشان بنتكلم عن بلدنا ولا عشان صلاح هو اللي عمل وهو التريند وامبارح سابوا الماتش وتعليقات الكرة الأرضية والإعلام في العالم كله، ومسكوا في تصريحات أحمد موسى".

وأردف: "زعلان أن هالاند اتغلب امبارح هل انتوا زعلانين على هالاند ولا فرحانين عشان صلاح؟، هالاند لم يكن في حالته وليفربول كان الأفضل، الجون اللي سجله صلاح لو في الكرة في رجل هالاند مكنش هيعرف يسجلها، لأن صلاح حريف".

وأوضح: "صلاح لاعب تقيل، وجوارديولا لما شاف الكورة رايحة لصلاح كان بيصوت ونزل على الأرض لأنه عارف إن صلاح هيسجل، ودا أحسن مدرب في العالم لأن تقديره أن صلاح هيسجل 100%"، متابعًا: "هدف جون امبارح من القليلين اللي يجيبه ومنهم صلاح، وهالاند لا يمكن أن يقوم بمثل ما عمله صلاح ومحدش ينطلق ويعدي بالطريقة دي غير صلاح".

وأشار إلى أن هالاند لاعب عالمي وحريف ولكن بعض الكرات لا يكون قادر على لعبها، ولا يستطيع المرور مثل محمد صلاح، مؤكدًا أن الإعلام الإنجليزي والعالم كله مفيش حد مش بيتكلم عن صلاح من إمبارح، قائلًا: "بنقول تحيا مصر على بلدنا متضايقين وبتمسكوا في كلمة احمد موسى واي حاجه تتقال، قاعدين وراصدين أي حاجه تتقال وكل دا ولا أي تاثير ولا أي شيء".