ميدو يوجه 4 رسائل بعد خسارة المنتخب من روسيا

كتب- محمد همام:

وجه أحمد حسام "ميدو"، المدير الفني الأسبق لفريق نادي الزمالك، عدة رسائل بعد خسارة المنتخب المصري من نظيره الروسي بثلاثة أهداف مقابل هدف ضمن مباريات الجولة الثانية عن المجموعة الأولى.

ميدو كتب عبر صفحته الشخصية "تويتر": "صباح الخير على الجميع كويس إن مصر كلها زعلانة إن إحنا طلعنا بالشكل ده من المونديال ده دليل إن المرة اللي جاية مش هنكتفي بس بالصعود، ولكن هنبقى عايزين نعمل كأس عالم كويس وده كلام كويس جدًا علشان نمشي لقدام ونطور".

وتابع: "أهم حاجة لازم نحترم كوبر وجهازه ولازم ماننساش الإنجاز اللي عملوه ماينفعش نبقى جاحدين!! الناس دي استلمت المنتخب مابيوصلش كاس أمم بقاله ٣ مرات ووصلونا نهائي كأس الأمم ووصلونا كأس عالم يبقى ماينفعش ننسالهم كل ده!! الناس دي محترمة أخلصت في كل يوم ودقيقه في عملهم!".

وأكمل: "دلوقتي مصر كلها داقت لذة وحلاوة التواجد في كأس العالم ولازم كلنا نفكر إزاي نعمل كل حاجه علشان نبقى موجودين في كأس العالم اللي جاي وإزاي لما نبقى موجودين مانظهرش بالمستوى ده ونكون شكلنا أحسن ونعمل نتائج أفضل!!".

وأتم: "فكرة الشماعة وتعليق مسؤولية الهزيمة على شخص بعينه عند الإخفاق يجب أن تنتهي إحنا عندنا منظومة لازم تتحسن وتتطور ولازم ناخد قرارات شجاعة علشان يبقى عندنا كورة أحسن ومنتخبات أفضل!! لازم يبقى عندنا خطة للمستقبل ونعرف الناس إيه هي، ونمشي عليها، ونحاول ننجح فيها!!".

المنتخب المصري تعرض للخسارة الثانية على التوالي في المونديال، بعد الخسارة في المباراة الافتتاحية أمام أوروجواي، بهدف دون رد.

ويحتاج المنتخب المصري إلى معجزة من أجل الوصول لدور الـ16، حيث يحتاج لخسارة منتخب أوروجواي من السعودية وروسيا مع فوزه في المباراة الأخيرة أمام السعودية.