إفطار وسحور.. حكاية "أم عبدالله" والقائمة الدوارة في وجبات الخير بالبحيرة -صور

البحيرة - أحمد نصرة:

وسط مطبخ محبي الخير بدمنهور في محافظة البحيرة، تقف "أم عبدالله" في حركة دؤوبة لا تكل من إعطاء ملاحظاتها المستمرة لأعضاء فريقها، لتضمن خروج وجبات رمضان في أفضل جودة قبل توزيعها على الأسر المستحقة.

تقول أم عبدالله: "بنقدم كل يوم في رمضان 150 وجبة وطموحنا إننا نضاعف العدد ده في المستقبل وتوصل لـ 1000 وجبة يوميًا مع زيادة مساهمات أهل الخير ".

وتضيف: " إحنا مش بنقدم فطار بس، لكننا بنقدم سحور كمان، الأسرة وهي بتستلم وجبات الإفطار بتستلم معاها وجبات السحور، من الجبن والفول والبطاطس والسلطات والمقبلات".

وتؤكد أم عبدالله "بنكون حريصين إن الوجبة تكون متكاملة ومشبعة تماما للفرد، وكل أسرة بتاخد وجبات بعدد أفرادها، ولازم يكون معاها كمان صنف حلو".

وتوضح " عندنا قائمة دوارة ومتجددة للطعام يوميًا فيها 8 إفطارات مختلفة، كل يوم بننفذ إفطار مختلف عن اللي قبله، وكل أسبوع بنبدأ بترتيب مختلف، عشان نضمن إن كل أسرة يلف عليها في دورها الأسبوعي إفطار مختلف، وتكون داقت كل الأصناف اللي بتعملها".

وعن المستهدفين بتلك الوجبات تقول "أم عبدالله": " فيه حالات مسجلة عندنا وعملنا ليها بحث عشان نتأكد إنها مستحقة، وكل أسرة بتاخد على مدار الشهر 5 مرات، وكل يوم بنعمل عدد زيادة من الوجبات للطوارئ".

وتختتم أم عبدالله حديثها: " مش بنقدم غير الحاجة اللي نفسنا بتروح لها وبنفس الجودة اللي بتعملها في بيوتنا، واللي مش بنرضى ناكله عمرنا ما نقدمه في وجبات الخير".