"مواطن شريف بلغ عني".. مقدم "كريزي تاكسي" يكشف كواليس القبض عليه

كتب- محمد جمعة:

كشف الفنان إبراهيم السمان، مقدم برنامج المقالب "كريزي تاكسي" تفاصيل القبض عليه وفريق العمل خلال تصوير إحدى حلقات البرنامج.

وقال السمان، خلال مداخلة هاتفية مع برنامج "حضرة المواطن"، مساء الأحد: "وإحنا بنصور يبيقى مساعد مهندس الصوت في شنطة العربية، وشباب الإنتاج بيقفلوا عليه الشنطة، وطبعًا في عربية ميكروباص قدام مني وعربية ورانا عشان التصوير والتأمين".

وأضاف السمان: "أحد المواطنين الشرفاء المحترمين مشي ورانا وظن إن في حاجة مريبة، ولم يدرك إن ده برنامج مقالب، فبلغ النجدة.. وده لو كان حقيقي المفروض الراجل ده المفروض يتكرم".

وتابع مقدم برنامج "كريزي تاكسي": "الشرطة حضرت بسرعة وبدأوا يتفهموا الأمر.. ولما قرب مني المواطن ده، قالي يا نهار أبيض ده أنا عارفك، قالتله ولا يهمك اللي انت عملته تصرف محترم ومن شيم الشعب المصري، ومفيش أي مشكلة خالص، وأي حد لو شاف موقف زي ده لازم يتصرف نفس تصرفك".

واستطرد السمان: "ضباط الشرطة طلبوا مننا التصريح ورحنا على قسم العجوزة وتفهموا الموقف، وحضر الدكتور أشرف زكي نقيب المهن التمثيلية، والحمد لله الموضوع خلص".

وفي نفس السياق، قال السمان: "أنا ماعنديش فبركة في البرنامج.. وفي الموسم التاني في ناس بتعرفني في نص التصوير، ومقدرش أعرض ده للجمهور، وعشان كده بتعب جدًا عشان الاقي حد أعمل فيه المقلب".

وتابع السمان: "الحقيقة بقى إن الراجل اللي بلغ عني هو اللي لبسني المقلب، ومش مشكلة لما يتعمل فيا مقلب مرة، بعد ما عملت في ناس كتير".

يذكر أن النيابة العامة بالعجوزة قررت صرف إبراهيم السمان مقدم برنامج، كريزي تاكسي، وآخرين من فريق عمل البرنامج، من سراي النيابة، دون توجيه لهم أي اتهام، بعد القبض عليهم أثناء تصويرهم حلقة من البرنامج.

وكانت الأجهزة الأمنية تمكنت من إلقاء القبض على إبراهيم السمان مقدم برنامج كريزي تاكسي، و3 آخرين من فريق عمل البرنامج بتهمة التصوير في الشارع دون ترخيص.

تعود تفاصيل الواقعة إلى تلقي قسم شرطة العجوزة بلاغًا من أحد الأشخاص، يفيد بخطف سيارة أجرة شخصا بشارع جامعة الدول العربية، وعلى الفور انتقلت الأجهزة الأمنية لمكان البلاغ للتأكد من صحة الواقعة.