تعرف على رسالة تامر حسني لجمهوره في أول أيام رمضان 2025

كتبت- منى الموجي:

وجه النجم تامر حسني رسالة لجمهوره عبر صفحته الرسمية على موقع التواصل الاجتماعي فيسبوك في أول أيام شهر رمضان 2025، مؤكدا أن ما كتبه يأتي من واقع مشواره الشخصي.

وكتب تامر "بروحانيات شهر رمضان الكريم زي ما متعودين إني بحاول من واقع الدنيا ومشواري الشخصي أي شيء بتعلمه لازم أوصلهلكم بعيداً عن الفن تماما. عمركم شوفتوا حد عايز يطلع خطوة قدام وباصص وراه، أكيد مش هيعرف.. طب هل فيه حد ممكن يبدأ جزء جديد في كتاب حياته وليكن الجزء الثاني وهو قاعد لسه بيقرأ الجزء الأولاني أكيد لا، طب يعمل إيه؟، أقولك أنا".

وتابع "ما دام خلص الجزء الأول يقلب الصفحة بس كده، ويركز في حاضره لأن اللي فات مش هيعرف يغير فيه حاجة فـ ليه بيضيع وقت مع اللي فات، طب الحاضر أولى، إنسى اللي فات يا صاحبي واقلب الصفحة يلا وابدأ حالاً، محدش هينفعك والعمر بيجري، ولو لسة في ماضيك ومخلصتش الصفحة حاول تخلصها بأحسن طريقة على قد ما تقدر عشان تفتح الجديدة بروح أجمل، يلا إنسى كل اللي تعبك زمان وكل ما تحبط افتكر إنك مدام صحيت ليوم جديد ولسة عايش ما موتّش، اعرف إن لسة ربنا عايز منك حاجات يعني ليك لازمة كبيرة جداً".

واختتم نصيحته "يلا قوم دور عليها واقلب الصفحة وابدأ بصفحة جديدة جميلة زيك، والله والله ده كلام حقيقي من واقع الحياة ومن واقع تجربة أي حد حلم وقدر يحقق أحلامه، مادام صحيت أنت ليك لازمة قوم يلا أقلب الصفحة".

تامر حسني ينتظر عرض فيلم "ريستارت" بطولة هنا الزاهد، باسم سمرة، محمد ثروت، إخراج سارة وفيق، تأليف أيمن بهجت قمر.