"متسمحش للناس تستخدم ماضيك لهدم فكرك".. تامر حسني يوجه رسالة للشباب

كتب-مصطفى حمزة:

وجه النجم تامر حسني، رسالة تحفيزية لمحبيه، لمواجهة الإحباط، ومراجعة ومواجهة أخطائهم، وكيفية التعامل مع من يحاول إحباطهم.

تامر، عبر صفحته في موقع فيسبوك، كتب،:"من خلال قرائتي و دراستي الفتره الأخيرة لبعض العلوم و أهمها علم الدنيا اللي احنا فيها دي و من خلال تجربتي الشخصية حابب اتكلم عن حاجه مهمه أوي، و تخص كل واحد فيكم نفسه يتقدم، يتقدم في عصر الإحباط اللي احنا عايشين فيه ده، لو أنت غلطت في حاجه زمان، ده مش معناه إنك مينفعش تبقى ضد التصرف ده دلوقتي، ده مش نفاق انت بس كبرت و عقلت و فهمت و بقيت أفضل زي ما ربنا عايزنا نتطور للأفضل".

وأضاف،:"فمتسمحش للناس انهم يستخدموا ماضيك عشان يهدوا فكرك الحالي دلوقتي، ده تطور طبيعي للّي عايز يبقى إنسان كويس و قلبه سليم، بالعكس بقى لازم لما حد يفكر يضايقك بطاقه محبطه ، أنا عايزك تاخد الطاقه دي تشتغل بيها و تحولها لوقود حرق يخليك تنجح، و تعلى اكتر عنداً في اللي عايزين يشوفوك فاشل، و تبقى عادة عندك كل ما حد يحبطك تنجح و تطور نفسك زيادة لحد ما اللي بيحبطك يشوفك فوق جداً و فارق عنه".

تامر، تابع،:" ساعتها هيضرب نفسه بالجزمة ، إنه كان بيحاربك عشان هو هتبقى طاقته فضيت و فشل عشان وظف طاقته ليك وانت وظفت طاقتك وطاقته لخدمتك، فبقى عندك كذا دافع للنجاح يسخنك و يحفزك، هيجيلك هو بقى ساعتها ضعيف و ندمان، اوعى تنتقم منه، و افتكر إن العفو عند المقدرة ثوابه كبير أوي عند ربنا، فبرضو هتاخد أكبر ثوابه و برضو بسببه و هتعلى تالت".

وأكمل ،: "و بكده انت بذكائك و إيمانك بنفسك و تقديسك لوقتك ،عرفت تخلي كل اللي جالك منه أو من الناس اللي شبهه في مصلحتك انت، عشان ركزت في نفسك و مشيت في حالك زي ما ربنا عايزك، و حذفت الناس المحبطة من حياتك".

واختتم تامر،:" ثق في نفسك ثق في تغييرك انت صح، اوعى تشوف نفسك قليل، كمل متشوفش نفسك غير ناجح و واصل لحلمك، و يارب اشوفكم كلكم ناجحين، و مش ملتفتين لأي مُحبِط وموظفين طاقتكم لخدمتكم، عشان طاقتكم زي البطارية لما يجيلها يوم و تخلص، تبقى خلصتها على نفسك و تطوير نفسك مع نفسك وعلاقتك مع ربنا قبل الكل".

النجم تامر حسني، طرح في رمضان الحالي، أغنية بعنوان "رمضان كريم"، من كلمات محمد مصطفى ملك، وألحان محمود أنور، وتوزيع محمد ياسر.

ويستعد تامر، لإحياء حفلا غنائيا يوم الجمعة 5 مايو بمركز المنارة بالتجمع الخامس ،ويتم طرح التذاكر خلال الأيام المقبلة.