ياسر جلال: شغلنتنا متعبة والفن رسالة قوية ومش حرام

كتبت- منى الموجي:

حل النجم الكبير ياسر جلال، ضيفا على برنامج مساء DMC، الذي يقدمه المذيع رامي رضوان على قناة DMC، ليتحدث عن مسلسله الجديد "علاقة مشروعة" والذي من المقرر عرضه ضمن خريطة رمضان 2023.

وأعرب ياسر في الحوار عن فخره بانتمائه للوسط الفني، مضيفا "احنا كفنانين على عكس ما الناس بتشوفنا يمكن زميل أو زميلة مش هقول يُظلم ولكن يتفهم غلط، أثناء تواجده في مكان في حفلة او مهرجان ويجده الجمهور يظهر بمظهر شيك ويتصور بشكل كويس، لأن ده ممكن يجيب لك شغل، رغم إن انا مش بروح مهرجانات لاني انطوائي شوية".

وتابع "المجتمع لازم يحتوي فنانينه، فعلا شغلنتنا متعبة مش بنقصد نعمل حاجة غلط أو مش مظبوطة، لكن أنا ملاحظ ان بعض الزملاء بيتعرضوا لهجوم شديد"، موجها حديثه للجمهور "ممكن يكون الفنان تعثر، غلط، متدبحهوش قم بتقويمه، ويبقى فيه نقد بس بدون تجريح، مش لازم تدب فيه لحد ما تموته، انتقد وازعل بس مش بالضراوة دي، فين الحب والتسامح، أنا شايف إن الفنان لازم يكون مقدر أكتر من كده".

وحكى موقف جمعه برجل وصفه بالطيب كان يعاونه في بعض الأمور المتعلقة بتجديد بيته، وأثناء إحضار بعض المستلزمات التي سيحتاجها، كان هناك تكدس مروري، ووقتها استمعا لأغنية "في يوم وليلة" للفنانة الراحلة وردة الجزائرية، ووجد ياسر الرجل يعلق: "ايه ده يا استاذ بيقولوا الفن حرام ده لولا أغنية زي دي في الزحمة دي كان الواحد انتحر".

وعلق ياسر "الفن مش حرام، هو رسالة قوية جدا صحيح ممكن يبقى فيه حاجة زيادة شوية، ننبه الفنان فياخد باله، والنقد اتعمل ليه عشان يقول للفنان انت هنا أسرفت".

ياسر جلال يشارك في دراما رمضان 2023 بمسلسل علاقة مشروعة تأليف سماح الحريري، إخراج خالد مرعي، ويشارك في البطولة: داليا مصطفى، مي عمر.