هالة سرحان تكشف تعرضها لـ"أجمل غلطة" على الهواء بعد فوز مرسي بالرئاسة

كتب- مينا غالي:

قالت الإعلامية الكبيرة الدكتورة هالة سرحان، عن سؤال حول رأيها في المذيعة التي كانت تضع "روج" على الهواء: "الناس بقت تافهة أوى.. طالما هي عارفة اللى بتعمله.. يعني هي عايزة تعرّف الناس أنها بني آدمة وبتصلح الروج طالما مالحقتش تعمله قبل الهواء، هي حرة وست عادية زى أي ست".

وأضافت خلال لقاءها ببرنامج "حبر سري" على قناة القاهرة والناس: "أنا اتقطع عليّ بالغلط وأحلى غلطة في الحياة.. أمل لطفي اجمل مونتير الكترونى في الدنيا ورفيقتي اللي ماينفعش أشتغل من غيرها.. كان يوم انتخابات الإخوان اللى جابت اللى كان رئيس، وبقول هات لي يابنى ورقة كده علشان أشوف النتائج الأولية وكانت الساعة 9 ولما بحسب ولقيته متقدم، فروحت عملت بإيدي إشارة استنكار واستياء، راحوا قالولى أنتِ كنتِ على الهواء، وتانى يوم لقيت على جوجل الأخبار بتقول: "مذيعة مصرية تبدي استياءها من فوز مرسي على الهواء"، بس الحمدلله ربنا خلصنا من الأيام دي وأعطانا أجمل هدية في الدنيا الرئيس عبد الفتاح السيسي اللي مصر ماشية في عهده بخطى حثيثة لأول مرة تجاه الإنجازات".

وتابعت: "الحقيقة حجم التغيير مذهل ومبهر، يعنى كنت بروح مدينة الإنتاج الإعلامي وبمشي طريق طويل مظلم ومخيف، وحاليا مفيش عامود نور مطفي، كمية الأنوار والإشارات مذهلة، فعايزة أقول إن على جميع المستويات مصر فيها ثورة رقمية ولازم نعيش عصر الرقمنة لأن مصر لازم تتنقل نقلة تانية ونصل للمستوى اللي احنا عايزينه.