فيديو.. أحمد زاهر: "فتحي ممكن يموت بعد حلقتين ربنا لازم يعاقبه"

كتبت - ياسمين الشرقاوي:

قال الفنان أحمد زاهر، إنه يكن الكره لشخصية "فتحي"، التي يجسدها في مسلسل "البرنس": "لما قريت الورق كرهته أوي".

وعن تحضيراته للشخصية، قال "زاهر"، في لقاء مع برنامج "One Take": "فتحي شخصية قاسية جدا وصعبة أوي ومن البداية أستاذ محمد سامي كان بيحكيلي عن تفاصيل الشخصية كل ما يكتب حاجة، وأنا كنت بقعد أفكر في خبراتي الحياتية عشان أحط تفاصيل الشخصية مع سامي، وقريت الورق أكتر من 50 مرة".

وأضاف: "فتحي أشر دور شوفته في الدراما المصرية، وأنا بقرا الورق كرهته، وكان لازم الناس تكرهه، لأنه ده نجاح ليا إنما لو حبوه أو الشخصية عدت مرور الكرام يبقى أنا فشلت".

وردًا على المبررات لخلق شخصية بهذا الجحود، قال أحمد زاهر: "لأ طبعا المبررات مش كافية، لكن هو مقتنع بده، مهما يكون عندك كل المبرارات مفيش حد يقتل أخوه أو أي حد تاني".

وتابع: "قابلت كذا فتحي في حياتي وخدت من كل فتحي صفة عشان أخرج بالشخصية دي".

وعن إن كانت نهاية فتحي سترضي الجمهور وتشفي غليله، قال: "أه طبعا فتحي لازم يتعاقب ممكن يموت بعد حلقتين ويكمل الصراع مع حد تاني، شخصية شريرة زي دي لازم ربنا يعاقبها".

مسلسل البرنس بطولة محمد رمضان، نور، أحمد زاهر، نجلاء بدر، روجينا، إدوارد، صفاء الطوخي، سلوى عثمان، محمد علاء، رحاب الجمل، دنيا عبد العزيز، محمد مهران، محمد جمعة، عبد العزيز مخيون، بدرية طلبة، أحمد داش وريم سامي، تأليف وإخراج محمد سامي.