"فلوس عملية".. عم عبده عثر على 44 ألف جنيه وسط القمامة وأعادها لصاحبها بالبحيرة

البحيرة - أحمد نصرة:

ضرب عامل نظافة بمدينة دمنهور ، في محافظة البحيرة مثالًا في الأمانة، بعدما عثر أثناء عمله على مبلغ مالي قيمته 44 ألف جنيه، وأعادها لصاحبها.

ويروي عبده إسماعيل بطل الواقعة تفاصيلها: "كنت بنضف الشارع عند المستشفى وأنا بكنس ناحية الفرن إللي هناك، لقيت كيس أسود تقيل، شكيت في إللي فيه، فتحته لقيت جواه كيس أبيض تاني وفيه الفلوس".

ويضيف عبده: "جريت على المشرف عطيته الفلوس وبلغنا رئيس مجلس المدينة، وبعد كده رحنا المنطقة قلنا إننا لقينا مبلغ اللي ضايع منه يجيب أوصافه ويستلمه من مجلس المدينة، تاني يوم أصحابه استلموه وطلع إنه كان فلوس عملية".

ويؤكد عبده: "شغلتنا دي شغلة أمانة ودايمًا بنلاقي أمانات للناس أثناء عملنا قبل كده لقيت تليفون ومرة تابلت وبرضه رجعتهم لأصحابهم".

ويختتم عبده حديثه قائلا: "عندي ولدين وبنت في المراحل التعليمية عمري ما أقبل أدخل قرش صاغ حرام عليهم، ربنا يغنيني وأقدر أربيهم بالحلال"

وقال أحمد فرغلي رئيس مركز ومدينة دمنهور، إن عم عبده يستحق التكريم لأمانته، لذلك قررنا تقديره معنويًا من خلال شهادة تقدير وماديًا من خلال تخصيص مكافأة له.

وأضاف «فرغلي» أن مثل هذه النماذج تستحق الدعم والرعاية وتصدرها للمشهد لتكون قدوة لأجيالنا القادمة.