"عيالي اتدفنوا تحت الأنقاض قدامي".. عايدة تروي لحظات الرعب في حادث منزل البحيرة المنهار- فيديو

البحيرة - أحمد نصرة:

لحظات عصيبة تعيشها عايدة وأسرتها بعد أن فقدت طفليها وأصيبت شقيقتهما في حادث انهيار منزل بمدينة دمنهور، نتيجة انفجار أسطوانة بوتاجاز في مخزن أسفله.

في بث مباشر أجراه موقع مصراوي معها روت عايدة تفاصيل لحظات الرعب التي عاشتها وقت انهيار المنزل: كنت بوضب أوضة النوم حصل الانفجار، لقيت نفسي طرت في الهوا ونزلت في الشارع، والناس بيسحبوني، وعمالة أنزف، بعدها بثواني البيت كله وقع وعيالي التلاتة تحته"

وتضيف عايدة: " بقيت زي المجنونة بصرخ على عيالي ومش شايفاهم، طلعوا الأول ميت، وبعده طلعت البنت متكسرة في كل حتة في جسمها، وفضلوا يدوروا على أخوهم لغاية ما لقوا جثته المغرب".

وتكمل عايدة: " جوزي شغال على دراعه وكل لبسنا وحاجتنا راحت تحت الأنقاض ومعندناش مكان نقعد فيه غير شقة حمايا وكلها أوضة وصالة 3 أسر عايشين فيها".

وتختتم عايدة حديثها: "مليش طلبات غير عاوزة شقة تصلح للسكن أقعد فيها أنا وجوزي وبنتي إللي باقيالنا من الدنيا".

كان منزلًا مكونًا من 4 طوابق في منطقة أبو الريش بمدينة دمنهور محافظة البحيرة انهار صباح اليوم الجمعة، إثر انفجار أنبوبة غاز في مخزن غير شرعي، ما أسفر عن وفاة 6 أشخاص وإصابة 23 آخرين.