"دخلت تجبس إيديها طلعت قاطعة النفس".. والدة الطفلة "عتاب": الإهمال الطبي قتل ابنتي- فيديو وصور

البحيرة - أحمد نصرة:

شهدت محافظة البحيرة واقعة حزينة بوفاة الطفلة عتاب 4 أعوام، والمقيمة بمركز أبوحمص، أثناء إجرائها لعملية جراحية في ذراعها عقب تعرضه للكسر وسط اتهامات من أسرتها لأطباء بالإهمال والتسبب في موتها.

تروي أميرة النجار - والدة عتاب تفاصيل الواقعة قائلة: " يوم الجمعة إللي فاتت عتاب وقعت من على السلم ودراعها ورم، جدتها خدتها للمستشفى العام، الدكتور هناك قال محتاجة جراحة، لو هتعملوها هنا هتستنوا 3 أيام وعرض علينا يعملهالنا في نفس اليوم في مستشفى خاص تبعه".

وتضيف الأم: "وافقنا نعمل العملية بره، وعطانا روشتة قالنا هاتوها واسبقوني على المستشفى الخاص، وحصلنا بعدها علطول، كانت الساعة 2 الضهر ودخلها العمليات علطول، فضلت جواها لغاية الساعة 5 وبعدها لقينا دكاترةو ناس كتير من المستشفى طالعة وداخله عليها ومحدش راضي يفهمنا فيه إيه، نسألوهم يقولولنا هتفوق دلوقتي، لغاية ما بلغ نا بوفاتها".

وتلتقط جدة عتاب أطراف الحديث: " حاولنا نفهم سبب الوفاة محدش راضي يعرفنا، واحدة داخلة العمليات على رجليها وبتعمل عملية بسيطة في دراعها، إيه يموتها، لغاية ما دكتور معرفة قالنا إن الأكل إللي في معدتها طلع على الجهاز التنفسي واتسبب في اختناقها".

وتكمل الجدة: "الدكتور إللي عملها العملية، قبل ما يدخلها سألني هي أكلت ولا لأ، قلتله أيوه واكلة، طاب إزاي يدخلها العملية علطول، وإزاي ميحضروهاش في المستشفى عندهم ويحجزوها 6 أو 8 ساعات عشان يضمنوا إن مفيش أكل في معدتها حسبنا الله".

ويقول مصطفى الطوخي والد عتاب: "أنا شغال سواق في الكويت بلغوني بالخبر، جيت تاني يوم وأنا مش مصدق، كل واحد عاوز يهرب من المسؤولية، دكتور البنج ودكتور الجراحة كل واحد بيرمي عالتاني والمستشفى الخاص بيقول أنا مليش دعوى أنا مكان بيتأجر وبس، طاب و حق بنتي فين".

ويوضح الأب: "حررت محضر في الشرطة وبعتولي ناس عشان أتنازل وبيضغطوا عليا كتير، لكن عمري ما هسيب حق بنتي، وأنا واثق في قضاء مصر العادل".