يا حلاوة المحصول.. 25 صورة ترصد فرحة مزارعي الثوم في البحيرة

البحيرة - أحمد نصرة:

في مثل هذا الوقت من العام يبدأ مزارعي البحيرة في حصاد محصول الثوم، لتتحول الحقول إلى اللون الأبيض، وسط فرحة كبيرة ببدء موسم يعود بالخير على الكثير من الأسر العاملة في مراحل جمع وتجهيز هذا المحصول المطلوب بشدة للتصدير.

في البداية يقول أحمد أغا - مزارع: "فيه ناس بتزرع الثوم زرعة سنوية وسط الفراولة على المصطبة خط واحد، لأنه مبياخدش مساحة وكمان مفيد للفراولة لأن ريحته بتبعد بعض أنواع الديدان الضارة".

ويضيف أغا: "الثوم بيتزرع في أكتوبر ويبدأ حصاده في شهر مارس، لو وسط الفراولة الفدان بيجيب من 2 إلى 3 طن، أما لو مزروع لوحده وينتج من 10 إلى 15 طن".

ويكمل: "أغلب إنتاج البحيرة، بيتصدر، ومن أهم الدول المستوردة روسيا، فرنسا، بولندا، السعودية، وأسبانيا وغالبًا بياخدوه أخضر قبل ما ينشف، عشان بيدخل المصانع ويتفرم، وأحيانًا بيدخلوه في صناعات دوائية".

وعن أنواع الثوم يقول خيري الشويخ - تاجر: "فيه نوعين من الثوم المصري التقليدي ولونه أبيض، والثوم الأحمر أو الصيني، المستوردين بيفضلوا النوع الثاني لأن حباته كبيرة، أما المصريين فبيفضلوا الثوم الأبيض لأنه أطول عمرًا في التخزين".

ويضيف الشويخ : "المستوردين بيطلبوا الثوم بمواصفات معينة، والعمال والستات في الأرض بيجهزوه بيقشروا الورقة الخارجية وبيقطعوا العنق بمسافة 5 سم، ويسلموه حسب الطلب إما في سبت خوص أو شيكارة أو كرتونة".

ويقول سلامة أسكان - تاجر: "الستات بتشتغل وبتتحاسب على تجميع كيلو الثوم وتجهيزه من ربع إلى نصف جنيه، وممكن بتعملها في اليوم 100 أو 120جنيه".

وعن أسعار الثوم يقول أسكان،: " التاجر بياخد ثوم التصدير من إيد الفلاح بـ 4 أو 5 جنيه للكيلو، وبعد تجهيزه وتنضيفه بيسلمه للمصدر بسعر 10جنيه، وأسعار السوق المحلي من إيد الفلاح من 3.5 إلى 4 جنيه"