مواطن لوزير النقل: أنا جريت عليك عشان أشكيلك.. والوزير: "وأنا جاي أسمعك وهاتصرف"

المنيا- محمد النادي:

زار الفريق كامل الوزير، وزير النقل، اليوم السبت، محطة السكة الحديد في محافظة المنيا، والتقى أحد الركاب الذي اشتكى له من الباعة الجائلين والمتسولين".

وقال الراكب: "يا سيادة الوزير أنا جاي جري عليك عشان أشكيلك، القطار القبلي أنت منعت الباعة الجائلين تطلعه لكن رئيس القطار بيسيبهم يطلعوا وبيطنش، وأنا ركبت مرة من مغاغة وعشان يوقفوا القطار بيشدوا البلف، فالسواق الذكي بيكرمهم ويهدي شوية ودا بيحصل في مغاغة وبني مزار، صدقني أنا بثق فيك لأن حضرتك بتاع شغل".

ورد الوزير: "وأنا جاي عشان أسمعك احكي ومتخافش غير من ربنا، وأنا لو شوفت بياع هامسكه بنفسي، وعارف كل اللي بتقوله دا، عاوزك تكتبلي الواقعة دي وأنا هاتصرف، أنا مينفعش حد يقولي كلام كدا واخده، وعندنا شركة أمن لمنع ركوب الباعة القطارات".