"نشيل بعضنا" مبادرة بالبحيرة لخفض الإيجارات ٥٠% خلال أزمة كورونا

البحيرة - أحمد نصرة:

في ظل الإجراءات الاحترازية والقرارات التي اتخذتها الحكومة المصرية لمواجهة فيروس كورونا، تعرض العديد من الأنشطة التجارية للتأثر بسبب فرض حظر التجول وإغلاق المحال التجارية في الفترة من ٥ مساء إلى ٧ مساء، وإغلاقها بشكل كامل على مدار يومي الجمعة والسبت، وكانت المطاعم والمقاهي هي الأكثر تأثرًا بعد قرار إغلاقها بشكل دائم.

وأمام هذه الخسائر والصعوبات التي يواجهها أصحاب الأنشطة التجارية البسيطة، أطلق بعض المواطنين مبادرة تحث الملاك على تخفيض القيم الإيجارية للمحال خلال فترة الأزمة، بمقدار ٥٠% كشكل من أشكال التكافل الاجتماعي والتعاون لتخفيف العبء عن المضارين من الظروف الراهنة.

يقترح أحمد البهدلي: "بالنسبة للقيمة الإيجارية للمحلات التجارية وكذلك الوحدات الإدارية وما يماثلها لابد من تخفيضها ٥٠% لمدة ٣ شهور كحد أقصى مؤقتًا ولحين وضوح الرؤية إبتداء من أبريل ٢٠٢٠م نظرًا لأن ٩٩% من المؤجرين يقومون بتحصيل القيمة الإيجارية في أول الشهر وبالتالي فإن المستأجر دفع شهر مارس فمن العدل ومراعاة حقوق المؤجر والمستأجر ألا يتحمل الضرر الكامل طرف واحد منهما".

ويقول عمر عصام: "لازم بجد يكون في وقفة في موضوع إيجارات المحلات، ويكون فى تقدير من أصحابها، مينفعش إللى مأجر هو اللى يشيل الخسائر لوحده و مفيش شغل أساسًا كفاية إنه بيدفع أجور العمال من جيبه، قرارات الحظر مش غلط من الدولة بالعكس دى قرارات صح جدًا علشان نعدي الأزمة دي على خير بإذن الله، بس يكون في تقدير شوية بقى ونراعي ونشيل بعضنا".

ويتفق فهمي حليم: "الإيجارات غالية ومكسب أي محل بيروح أغلبه في الإيجار، والشباب بيضطر يأجر بالأسعار دي لأن مفيش قدامه غير كده، فمينفعش المالك ييجي في الأوضاع دي ويقول المستأجر هات الإيجار كله، إللي مايشوفش من الغربال يبقى أعمى".

ويكشف محمد حسني: "أنا عندي محل ومن نفسي قلت للمستأجر إني مش هاخد غير نص الإيجار بس، ومش مستعجل عليه، يعني منين ما تتيسر الأمور معاه إن ما شيلناش بعض في الموقف ده هنشيل بعض إمتى".

ويتطرق سالم بدر إلى الإيجارات السكنية: "الناس بتتكلم على إيجارات المحلات بس رغم إن السكني كمان نفس المشكلة، إللي مأجر شقة، وشغال في مجال أتأثر بالظروف دي، هيعمل إيه ويجيب إيجار منين، وهو يمكن مش عارف يجيب الأكل والشرب لعياله".

ويتحدث ربيع سعفان عن مشكلة المطاعم والمقاهي: "بالنسبة للكافيتريات والمطاعم الوضع أسوأ من المحلات العادية لأنهم هيقفلوا بشكل دائم، دول المفروض طبعًا ما يدفعوش حاجة لأنهم مشتغلوش خالص".

ويقترح عمر سلومة: "لو كان صعب الدولة تتدخل وتفرض تخفيض للقيم الإيجارية في الفترة دي، يبقى لازم يكون فيه توافق مجتمعي على كده، إحنا في أزمة ولازم كله يشيل بعضه".​