مزارعون بالأقصر بعد ارتفاع سعر الأسمدة:"الحكومة ضحكت علينا وهنبور الأرض"

الأقصر – محمد محروس:

سادت حالة من الغضب الشديد بين جموع المزارعين بمحافظة الأقصر بعد إقرار وزارة الزراعية رسميا زيادة سعر الأسمدة 50 % حيث ارتفع سعر الطن من 2000 إلى 2950 جنيها فيما وصل سعر الشيكارة الواحدة نحو 148 جنيها.

ورصد" مصراوي " ردود فعل المزراعين في محافظة الأقصر على القرار والتي جاءت جميعها رافضة، ووصفته بأنه سيكون له آثارا وخيمة علي الزراعة المصرية خلال الفترة المقبلة.

وقال محسن علي – مزارع - :"الحكومة ضحكت علينا وقالت انها مش هترفع سعر الأسمدة وده كان أحد شروطنا عشان نحصد محصول القصب ونورده للمصانع".

أضاف علي:" احنا الظروف اللي بنمر بيها دلوقتي كمزارعين صعبة وبدل ما الحكومة تساعدنا عشان نعدي أزماتنا راحت زودت سعر الأسمدة 50% حرام والله ".

بينما قال إبراهيم شحات – مزارع - :" الحكومة بالبلدي كده بتوقلنا بوروا أراضيكم وشوفولكم شغلانة تاني محدش يزرع ولا يقلع".

وطالب شحات الحكومة بالتراجع عن قرار رفع سعر طن الأسمدة مشيرا إلي أنه يصب فى صالح شركات الأسمدة علي حساب ملايين المزارعين في ربوع مصر.

محمود مصطفي – مزارع – يقول :" احنا هنا في الأقصر بنزرع القمح والبطاطس والبصل والطماطم وقصب السكر ودي كلها زراعات بتحتاج كميات كبيرة من الأسمدة وده يعني إن أغلب المزراعين هيمتنعوا عن زراعة هذه المحاصيل اللي بتعتبر محاصيل استراتيجية وهيزرعوا المحاصيل العشبية اللي ما بتستهلكش كميات كبيرة من الأسمدة".

يضيف مصطفي :" زيادة سعر الأسمدة بنسبة 50% مرة واحدة يقصم ظهر الفلاح اللى بيعاني منذ سنوات طويلة وتجاهلته الحكومات المتتالية" مضيفا :" احنا الفلاحين اللي بنشيل البلد في أزماتها واحنا الفئة الوحيدة اللي منظمتش مظاهرات احتجاجية رغم ظروف القحط اللي مرينا بيه وفي الآخر الحكومة تعمل فينا كده".

وأقرت الحكومة زيادة أسعار الأسمدة الموردة لوزارة الزراعة لتصل أسعار اليوريا إلى 2960 جنيها للطن والنترات إلى 2860 جنيها، مقابل 2000 و 1900 جنيها على التوالى قبل ذلك.

ووصل سعر الشيكارة وفقا للأسعار الجديدة إلى 148 جنيها لأسمدة اليوريا و 143 جنيها لأسمدة النترات شاملة الضرائب والنقل الذى وصل تكلفته مؤخرا إلى 105 جنيها للطن كمتوسط عام على جميع المحافظات.