بالصور:غضب بين أهالي دمياط بسبب عدادات الكهرباء.. وطوابير طويلة أمام الشركة

دمياط – محمد عبده

سادت حالة من الغضب بين أهالي مدينة دمياط الذين تجمهروا أمام مقر شركة الكهرباء بالشعراء، منذ صباح اليوم الخميس، احتجاجًا على وجود شباك واحد يخدم أكثر من 7 آلاف مشترك في الخدمة، الأمر الذي أدى إلى خلق طوابير طويلة تستنزف جهد ووقت المواطنين، فضلا عن ما اعتبروه "مغالطات" في العدادات الذكية.

وطالب علي البلتاجي، نجار، من الأهالي، محافظ دمياط الدكتور إسماعيل عبد الحميد طه بالتدخل وحسم مشكلة الكهرباء في قرى ومدن الإقليم، مضيفًا "الموضوع مستمر من حوالي سنتين، طوابير وبنوصل هنا الساعة 8 الصبح وبنروح على واحدة الضهر، ورانا بيوت ومصالح وكل ده لأن ناس كتير واقفة على شباك واحد، ارحمونا من المعاناة دي، والشركة غنية وفيها فلوس ولازم تحترم الناس".

وقال البلتاجي لـ"مصراوي" بنبرة حزن "مهزلة إن تشحن بخمسين جنيه وبعدها بيومين تلاقي الرصيد صفر، فتشحن تاني بخمسين وبالليل تلاقي مفيش جنيه في العداد، ونروح نقدم شكاوى نلاقي مفيش حد بيستجيب، ياريت ما سمعت الكلام وغيرت العداد".

وأشار مجدي كمال، من قرية العدلية، إلى أن هناك مغالطات عديدة تحدث بشكل يومي للكثير من المواطنين، موضحًا "قمت بتغيير العداد وانتهيت من سداد ما علي من مديونيات لكن أشحن بـ 100 جنيه وينتهي الرصيد في 4 أيام ومفيش عندي تكييف أو دفاية واستخدامي بسيط.. يرضي مين ده، كلمت أحد النواب في البرلمان ووعدني هيتصرف لكن مفيش حل، والموضوع مش عليا لوحدي ده كتير من أهالينا حصل معاهم الموقف ده وبيحصل لسه".

وتابع حديثه "أنا ممكن أقف في طابور وأستحمل لكن ربع ساعة أو حتى ساعة مش 3 ساعات علشان أشحن عداد الكهربا، وبعدها بكام يوم أشحنه تاني وتالت، عايزين موظفين بأجهزة كمبيوتر للتخفيف على الناس".

إلى هذا، أعلنت المهندسة ابتهال الشافعي، رئيس مجلس إدارة شركة شمال الدلتا لتوزيع الكهرباء، أن هناك منحة يابانية قدرها مليار جنية منحة يابانية لتطوير قطاع كهرباء دمياط.

وقال المهندس السيد العقادي، رئيس قطاع كهرباء دمياط، إن وفدا يابانيا قد زار القطاع وتفقد المكان المقترح لعمل تحكم آلي في فصل وتوصيل الكهرباء بدمياط من خلال منحة يابانية وقراءة العدادات عن بعد وكشف الأعطال حتى في منزل المشترك.