٢ مية بطيخ بسرعة يا بني..!

ـ يا فندم مالوش لزوم. أنا جاي أتكلم عن الإعلام.

ـ تشرب مية البطيخ الأول. وبعدين نتكلم عن الإعلام. وبعدين ماله الإعلام؟ إعلامنا زي الفل والحمد لله.

ـ زي الفل؟ يا فندم البلد بتبني مشروعات عظيمة محصلتش في تاريخها والناس مش حاسة بيها.

ـ أديك انت قلت آهو. الناس مش حاسة بيها. يبقي العيب في مين. في المشروعات ولاّ في الناس؟ معلش أقعد معووج واتكلم عدل.

ـ ما هو ده دور الإعلام. ربط الإنسان بقضايا بلده وإنجازاتها وتنمية الإحساس الوطني

ـ لأ معلش. الإحساس ما بيتطلبش. لو مكنش إحساس المواطن ييجي من جواه يبقى معلشSorry مش عايزينه.

ـ مش عايزينه؟

ـ أيوه وكفاية بقى. إحنا إعلام عنده كرامة.

ـ يا فندم الناس محتاجة إعلام يصحّي القيم والأخلاق والتراث.

ـ حصل وجايبين على كل القنوات مذيعين تزعق وتشخط في المواطن عشان يصحّي فيهم

الحاجات اللي انت بتقولها دي ومبيصحاش. نعمل إيه أكتر من كده؟ قول لي نعملكوا

إيه؟ قنوات واشترينا. تسريبات وحطينا. وعلى رأي المثل بره وجوه فرشت لك

وانت مايل وإيه يعدلك؟

ـ يا فندم، الإعلام ده بناء رأي عام. قيادة رأي عام. فكر وأدب وتنوير. الإعلام مهنة.

صنعة ليها أصولها.

ـ وإحنا ما بخلناش. وأقل واحد على شاشاتنا صنايعي إيده تتلف في حرير. سباكين تلاقي

. كفتجية تلاقي. مبيضين محارة تلاقي. بطلوا بطر بقي.

ـ بطر!

ـ أيوه بطر. حتى لما طلعنا كام واحد من رجالتنا يهلفط ويقول عايزين نسمع

المعارضة. ما تأخرناش. طلعنا كرتونة المعارضة من تحت الحوض. هي صحيح

ريحتها كانت مش ولا بد. بس بدرنا بيها القنوات.

ـ يعني حضرتك عارف إن صلاحيتها منتهية. بس اللي عايز أضيفه كمان إنها مش بتبني

معارضة إيجابية تبني البلد.. دي بتستغل الفرصة اللي انت قدمتها لها وبتحط السم في الدسم.

ـ من الناحية دي اطمن. أنا عامل دايت وممنوع من الدسم. ما تقلقش إحنا متابعين وعنينا مفتحة قوي.

ـ يا فندم عبد الناصر اللي بني زعامته إعلام. كتيبة مبدعين ثومة وحليم وجاهين... إلخ وأدباء

ومفكرين. واللي بيحصل مع الرئيس ده جريمة رغم إنجازاته اللي محققهاش حد قبله.

حرام اللي بيحصل في البلد ده محدش يحس بيه والله حرام.

ـ إنت ح تقولي حرام وحلال؟ آه شكلك يا إخواني يا سلفي. وبعدين مين دول ثومة وحليم

والناس اللي بتتكلم عنها دي. ييجوا إيه في نمبر وان لوحده اللي عنده ٣ ملايين فولورز؟

حد فيهم يقدر يرد على الواد محما زي ما ردت الست ٥ مواااه؟ إحنا مكسرين الدنيا ترندات ولايكات، إنت بس الظاهر الباقة عندك بعافية شوية.

(استغرقت في صمت عميق وأنا أكتوي بنار ما يحدث. تحرق قلبي الحسرة على وطن يمتلك مئات الألوف من المبدعين المخلصين. يساق إلى زوايا الجهل والبلاهة عمداً أو جهلاً. وعلى بناء يرنو إليه الملايين حول العالم بعين الفخر، بينما نحن نتفاخر بقدرتنا على تسفيهه والحط منه).

ـ إيه.. سرحت في إيه؟

ـ لا يا فندم. أنا بس ليا طلب. ممكن ٢ مية بطيخ كمان.

ـ كنت متأكد إنه ح يعجبك. وكنت عارف إن الاجتماع معاك ح يكون مثمر خصوصًا إنهم بلغوني إنك ٢٥ سنة في الميديا وواخد جوايز عالمية وحاجات كتير كده عرضوها عليا قبل المقابلة. بس إنت بتعمل إيه دلوقت بالخبرات دي كلها؟

ـ أنا دلوقت في الحقيقة مشغول بمشروع كبير جداً.

ـ قول.. فرحني.

ـ بسقّع قلل..!