"لم يصلنا سوى 3.5 مليون طن".. الرئيس يتحدث عن "الأسعار الاسترشادية" للقمح

كتب- محمد عمارة:
قال الرئيس عبدالفتاح السيسي، إن إنتاج مصر من القمح يصل لنحو 10 ملايين طن سنوياً.

جاء ذلك خلال لقائه اليوم الأربعاء، مع أهالي قرية "الأبعادية" بمحافظة البحيرة، بعد افتتاح عدد من المشروعات ضمن مبادرة "حياة كريمة".

وأضاف الرئيس السيسي: "كنت بكلم إخواتنا المزارعين، طلبوا أسعار استرشادية مشجعة، علمناها، مش جاي ألوم حد، أنا بتكلم مع أهلي، اه أومال ايه انتوا أهلي، ولي الشرف، عملنا السعر، أول ما المزارعين لقوا حد تاني عمل سعر أكثر راحوا مدينهوله، أنا كنت بحطه في التموين اللي بيمس 70 مليون، المزارعين لما لقوا فرصة أحسن راحوا باعوه، لا بأس، هيوصل للناس بس بسعر أعلى".

وتابع: "الإنتاج في مصر من القمح ممكن يبقى 10 مليون طن، حد يقول إحنا في الريف بنخلي قمح عشان نعمل في المناسبات حاجة، احنا خدنا 3.5 مليون طن، يبقى في البيت 6.5 مليون طن، طب المخابز بتبيع لمين؟ للناس كلها، طب أنا لما باخد القمح، الرغيف بيتكلف 80 قرش ببيعه بخمس قروش، أنا مش باخده عشان أبيعه حتى بتمنه، طب حد تاني بيتاجر فيه".

واستكمل: "أنا عامل دايما كدولة، يبقى عندنا رصيد ميقلش عن 5 أو 6 شهور من السلع الاستراتيجية، عشان متحصلش أزمة، طب هضطر أشتري من برة، وده يجيبني لحاجة وهو موضوع الدولار، وله تأثير كبير على الأسعار، انتوا عارفين في زيت الطعام، أصل الناس في الريف متاخدش بالها، كان زمان من 40 و50 سنة بيغطي حاجته، كان حد بيجيب زيت، كان عيبة في حقه، حد كان بيشتري بيضة أو فرخة من الشارع، وكمان الريف كان بيطلع جزء للحضر، اتحولنا من حالة كنا موجودين فيها لحالة تانية، وبعدين نقول ظروفنا والأسعار بقت كده".