محمود سعد يقدم نصائح للمصريين لمواجهة ارتفاع الأسعار

كتب- إسلام لطفي:

قدَّم الإعلامي محمود سعد، نصائح للأسر خلال الأزمة الاقتصادية وارتفاع الأسعار بشكل كبير في الوقت الحالي.

وقال في بث مباشر له عبر صفحته الرسمية على "فيسبوك": "في الحالات اللي زي دي متشتريش إلا الحاجات الضرورية جدًا، وفيه وضع اقتصادي في منتهى الصعوبة، والحاجات بتغلى كل ربع ساعة دون مبالغة".

وأضاف: "أقرب حاجة أن الواحد ميروحش مشوار ملهوش لازمة، والواحد لما بيقعد مع الناس مش قادر يتصور إزاي عايشين كده.. وعندنا طول عمرنا في البيت فكرة الأولوية، ولازم ست البيت تشوف إيه الضروري، والواحد لما بيكون في ظرف اقتصادي صعب المفروض أنه يلم الدنيا".

وتابع: "اتحطيت في الظرف ده سنة 1994، لما استلفت فلوس عشان أكمل وأجيب عربيتي الجديدة، وغلطت وقتها، فتعبت ولكن في خلال 3 أو 4 اشهر لميت الدنيا كلها بحيث نرد الفلوس كلها".

واستطرد: "كل مخاوفي من مثل هذه الأزمات هي الاحتكاك بين البشر، أن الأب يتنرفز على الأم والأم تتنرفز على الأولاد، وأرجو من الراجل أنه ميحتكش بالزوجة لأنها غصب عنها والزوجة متزعلش من الراجل لأنه غصب عنه".

وتشهد أسعار العديد من السلع ارتفاع بشكل كبير خلال الآونة الأخيرة، مع محاولات الدولة في السيطرة على الأسواق ببعض الإجراءات.