السيسي عن طريق الساحل الشمالي: "في ناس كل هدفها التشكيك في اللي بيتعمل" (فيديو)

(مصراوي):

علق الرئيس عبدالفتاح السيسي، على أزمة طريق الساحل الشمالي، على هامش تفقده مساء اليوم أعمال تطوير كورنيش المقطم.

وقال الرئيس: "أنا بسمع وبتابع أي شكوى من المواطنين، زي الطريق الساحل، بس أنا بس عايز أقول، إن الطريق ده المفروض يخلص يوم 30 يوليو أو نص شهر أغسطس، لأن لما الطريق ينتهي، هيخلص كل الشغل الفني اللي عليه، ثم هيتعمله الإرشاد اللازم، ثم بيتحط عليه عناصر الشرطة لضبطه زي ما إحنا عايزين، وبالتالي إزاي طريق عرضه حارة أو اتنين، هيتقارن بطريق تاني عرضه 7 حارات".

وأضاف: "انتظروا لما الموضوع يخلص ويتشرحلكوا، وأنا ببقى مستغرب جدًا، أن المسئولين على الطريق مش قادرين يقولوا إن الطريق لسة مخلصش، وأنه لسة فيه شغل، وبالتالي الحكم مش مظبوط".

وأوضح: "هنعمل الطريق على قواعد المرور السليمة، ولا هنعمله على أسلوب الناس في الحركة، لأ هنعمله على قواعد المرور طبعًا، انتوا لازم تنتبهوا، كل ما الشغل بيتعمل، في ناس بتعد كل هدفها أنها تشكك في اللي بيتعمل، وتسيئ إليه، لا يا جماعة دي ناس بتحاول تحطلكوا تراب على شغلكوا، مش شغل الهيئة الهندسية، لأ ده شغل مصر، لأ يا جماعة الطريق هيتعمل طبقًا للقياسات العالمية".