"حلم عايز أحققه".. السيسي يوجه الزراعة بتوفير نوع رؤوس ماشية للمزارعين

كتب- محمد عبدالناصر:

قال الرئيس عبدالفتاح السيسي، موجها حديثه لوزير الزراعة السيد القصير، والحكومة، "أنا عندي حلم عايز أطلبه منك وأحققه.. عندنا تقريبا 2 مليون رأس ماشية".

وأضاف الرئيس، خلال احتفالية مشروع مستقبل مصر، اليوم السبت: "المواطن اللي عنده رأس ماشية عادية، بتنتج 1.5 كيلو لحم في اليوم وما يقرب من 8 كيلو لبن، لكن في سلالة ثانية تنتج 8 كليو لحم في اليوم وما يقرب من 20 و25 كيلو لبن، وبياكلوا نفس الأكل ونفس الشرب".

وتابع السيسي: ممكن أوفر للمواطن وجبات ولكن أنا عايز أحسن حياته بشكل دائم.. وده هيحصل من خلال توفير رؤوس ماشية، لازم تتعاون الدولة عن طريق وزارة التضامن وتكافل وكرامة والمجتمع المدني، ونستهدف نستهدف تغيير حياة المواطنين إلى الأحسن.

ووجه الرئيس حديثه لوزير الزراعة، قائلا: "لو قولتلي خلال سنتين أو ثلاثة إنك غيرت الرؤوس الحالية وعملت لهم إحلال هكون لك من الشاكرين".

ووجه السيسي كلمة لـ "أهل الخير"، قائلا: "يا أهل الخير ياللي عايزين تعملوا أعمال بر وعايزين ترفعوا وتحسنوا من حياة الناس، أوعوا تفتكروا إن البر بس إنك تدي حد ياكل أو تعمل مدرسة بس".

وأكد الرئيس السيسي: "البر كمان إننا نخلي المواطن ده بدل ما بيكسب 1000 و2000 أضاعف له الرقم دا على مستوى الفرد، وعلى مستوى الدولة هو نفس حجم الأكل والمياه بس نضاعف كمية الإنتاج مرة أو اتنين.. بس إزاي؟".

وتابع السيسي: "التعامل مع البشر مشكلة، مش مع الأراضي والمشاريع، من حيث كيفية إقناع أصحاب المواشي إزاي نأكلها نفس الأكل وتدر إنتاج أكبر".