التعليقات الكتير إهدار للوقت.. أول تعليق من محمود سعد على صندوق دعم الأسرة

كتب- إسلام لطفي:

علق الإعلامي محمود سعد، على ما يردده البعض بشأن صندوق الأسرة، قائلًا: "مسمعناش عن حاجة خالص، ومش عارفين تفاصيل الفكرة أو القانون الخاص بصندوق الزواج، ولازم نستنى ونشوف التفاصيل ونعلق وقتها".

وأضاف في بث مباشر له عبر "فيس بوك": "الراجل يسيب بيته وولاده ويروح يتجوز واحدة تانية، والست هي اللي تربي، والموضوع ده انتقل للعائلات الكبيرة والناس اللي عندهم إمكانيات، اللي لو صرف على ولاده مش هيتأثر في ميزانيته".

وتابع: "الراجل ده لما يجي يعمل رخصة عربية أو بطاقة جديدة نسأله عن رعايته لأولاده، وهي دي الحكاية، إنما فيه أب مات أو أب أصيب إصابة بالغة فعجز عن العمل، فندعم الأسرة، لكن معرفش يعني إيه واحد طلق مراته بمزاجه أو بالخلع وبعدين العيال ميلاقوش أبوهم.. والناس دي موجودين في كل مكان والناس بتحترهم وبتعاملهم أحسن معاملة عشان ليهم معاهم مصالح، لكن الراجل اللي بالشكل ده لا بد أن يظهر للمجتمع بشكل كبير جدًا، أنه أهمل في ولاده".

واستطرد: "إذا كان فيه صندوق لدعم الأسرة دي فكرة مفيش مانع منها، لكن نشوف إيه هي، لكن التعليقات كتير عليه من غير معرفة تفاصيله، اسمه إهدار للوقت ونستنى لما نشوف مشروع قانون ونشر بنوده ووقتها الناس تقول رأيها، ولازم إنقاذ الأسرة من الأب اللي بيسيب عياله من غير ما يصرف عليهم، لأنه بيكون عنده مشاكل كبيرة جدًا، وبيكون تركيبة غريبة جدًا وكسر قلب الست حاجة وحشة أوي".​