السيسي: أفكر في يوم القيامة.. وهذا طلبي من "قادرون باختلاف" يوم لقاء الله

كتب- أحمد السعداوي:

استمع الرئيس عبد الفتاح السيسي، إلى أسئلة أفراد "قادرون باختلاف"، خلال افتتاحه فعاليات "قادرون باختلاف"، اليوم الأربعاء.

وتحدث عمرو عيد، أحد أفراد "قادرون باختلاف"، إلى الرئيس السيسي، قائلًا: أنا عمرو عيد، 17 سنة، بطل سباحة في مركز شباب الجزيرة، في الصف الثالث الثانوي العام.

وسأل عمرو الرئيسَ السيسي، قائلًا، صباح الخير، إزي حضرتك، سعيد وفخور بحضوري معك: خُفت على بلدنا قوي إمتى؟

ورد الرئيس السيسي على عمرو، قائلًا: أشكرك، وأنا اللي سعيد وفخور بوجودي معكم.. أنا رجل كبير أفكر في الدنيا التانية؛ في يوم القيامة، يوم لقاء الله.. في اليوم ده صدقني وبكرة نشوفه.. ويومها أتمنى لما نقول يا رب احنا لنا مكان معاهم (يقصد "قادرون باختلاف") بس لو قالوا لأ؛ هيبقى موقفنا صعب قوي.

وتابع الرئيس السيسي: الخوف على مصر على طول دايم؛ في 2011 و2012 و2013 و2014، والموجة الكبيرة من الإرهاب وتفجيرات المساجد والكنائس ومديريات الأمن... أي حد كان يشوف مصر كان يقول خلاص.

واستطرد الرئيس: باقول ده عشان نخلي بالنا؛ فيه شباب من كل حتى دون تمييز دفع تمن كبير قوي عشان مصر تبقى بالهدوء ده، وفيه 3000 شهيد، و12 أو 13 ألف مصاب إصابة مؤذية؛ ده الثمن اللي اتدفع من ناس غالية علينا، عشان نقعد في أمان وسلام.. ربنا يرحمهم. وباشكر أُسرهم اللي ممكن يقولوا خلاص نسوينا، لا نسينا ولا نقدر ننسى.

واختتم عمر كلامه، مخاطبًا الرئيس: طول ما انت رئيس بعد ربنا، ما حدش يقدر يمس بلدنا.

ورد الرئيس السيسي، قائلًا: إن شاء الله.