السيسي عن صندوق قناة السويس: في الفلوس مالكوش دعوة سيبوني أنا

كتب- محمد نصار وأحمد السعداوي:

قال الرئيس عبد الفتاح السيسي إنه منذ عام 1975 وحتى اليوم؛ قناة السويس حققت تقريبًا 200 مليار دولار؛ متسائلًا: "لو حد كان شال 10% من الرقم ده وحطه في صندوق؟".

وأضاف الرئيس السيسي، خلال افتتاحه، اليوم الإثنين، مصنعَي إنتاج الغازات الطبية والصناعية ومحطة توليد الطاقة الثلاثية بمجمع الصناعات الكيماوية بأبو رواش بمحافظة الجيزة، أن الصندوق دخل البرلمان علشان يديله حصانة قانونية، ماحدش ياخد منه ولا يتصرَّف فيه إلا طبقًا للقواعد، ويخضع لتفتيش ورقابة الأجهزة الرقابية.

وخاطب السيسي الحضور قائلًا: انتبهوا لكلامي كويس؛ لو شيلنا 10% من دخل قناة السويس، كنا زمان الـ20 مليار دولار تمنها كام؟ 50 مليار دولار.. ييجي يعمل تطوير النهارده مش معاه، أو يدخل في شراكة مش معاه، عايز يقدم خدمة متقدمة مش معاه.. قُلت ماينفعش كده.

وتابع الرئيس: جِه الدكتور معيط والدكتور مدبولي قالوا مش هنقدر على خصم الفلوس دي، قُلت له افتكر لما قُلت لك فلوسك تخليها عندك في وعاء، عمل إيه، قُلت له اسمعوا كلامي وهتشوفوا الرقم اللي باتكلم فيه دلوقتي إن وزارة الإسكان تشتغل بـ8 مليارات جنيه في الشهر.

واستطرد الرئيس السيسي: بلد عايزة مليون وحدة سكنية في السنة، يبقى الوزارة دي تعملها 20 أو 50 ألفاً ولَا 200 و400، والقطاع الخاص يعمل شوية معها.

وقال السيسي: قناة السويس فيها 70 مليار دلوقتي، تقولوا طيب فين إحنا؟ في الفلوس مالكوش دعوة سيبوني أنا، هي غلبانة أوي، لو ما كانش نحرم نفسنا ونعمل مش هتلاقي.

وقال الرئيس: نعمل إيه؟ والله العظيم أنا صادق معاكم في كل كلمة، وربنا وحده شاهد عليَّ وهيحاسبني، ويا رب يكون الحساب طيب ويكون لنا أجر على اللي بنعمله.

واستطرد الرئيس: مش هينفع غير يكون عندنا أوعية، ده بيتاخد من وزارة المالية؛ لكن الفلوس لو دخلت عندها مفيش أمل لازم تخلص، لو هيئة قناة السويس عايزة تدخل في مشروعات تمولها؛ تمويل أرباحها باللي موجود دلوقتي 500 مليون في الشهر، طيب السنة الجاية تعمل مليار، واللي بعدها 2 مليار، يبقى أعمل إيه؟ مش أنتم قُلتم لي في رقابتك.. والله العظيم باحاول أعمل على قَد ما ربنا يقدَّرني.