لازم تعرفوا الحكاية.. السيسي يطمئن المصريين بشأن صندوق قناة السويس -تفاصيل

كتب- محمد نصار وأحمد السعداوي:

قال الرئيس عبد الفتاح السيسي، خلال افتتاحه، اليوم الإثنين، مصنعَي إنتاج الغازات الطبية والصناعية ومحطة توليد الطاقة الثلاثية بمجمع الصناعات الكيماوية بأبو رواش بمحافظة الجيزة: أنا ماخبتش عنكم حاجة، وفيه كلام والله مفروض طبقًا لمعايير السياسة والكلام ده ما يتمش طرحها على الهواء؛ لكن علشان أوضح الحقائق للناس باقوله.

وأضاف السيسي: مش من كام يوم حصلت موجة كبيرة جدًّا على الصندوق الاستثماري لهيئة قناة السويس، طيب أقول لكم بقى ده حلم، بس الناس لازم تعرف الحكاية؛ لما جِه الفريق أسامة في 2019، وباقول له عندك أموال إيه؟ قال لي: ماعنديش حاجة، قلت له: لما تعمل تطوير للقناة هتعمل إيه؟ قال لي هاروح لوزارة المالية.. في البلاد اللي ظروفها ماتستحملش لازم يكون في أوعية.

وتابع الرئيس السيسي: احنا علمنا صندوق في وزارة الصحة؛ علشان التأمين الصحي، والصندوق دلوقتي فيه 70 مليار جنيه.

واستطرد الرئيس: لمّا جينا في الموضوع ده قُلت إيه: يا جماعة إنتم حاطين معايير واشتراطات للبرنامج (التأمين الصحي)، إن الدولة هتعمل إنفاق على غير القادرين والموازنة بتقول هنقدر إن شاء الله بالنظام ده واللي ماتحققش في بلدنا قبل كده ولا بلاد أخرى أغنى منَّا، قُلنا فيه قيمة هتدفعها الدولة لغير القادرين وقيمة الناس تتحملها، واشتغلنا في بورسعيد و5 محافظات أخرى.

وأضاف الرئيس السيسي: قُلت إنتم بتحطوا افتراضات إن الناس تقدر تدفع، وحطيتم النسبة عليها؛ لكن هل عملتم نسبة لناس تانية محتمل تكون غير قادرة؟ قالوا لأ؟ قُلت لهم: ماينفعش لازم يبقى في احتياطي ألجأ إليه.

واستطرد الرئيس: قُلنا لازم يكون عندنا صندوق نحط فيه أموال ونعززه وندعمه من مصادر أخرى؛ بحيث لو دخلنا على محافظة تانية واحتاجنا فلوس آخد من الصندوق.

وذكر الرئيس السيسي: سألت وزير الصحة فلوس الصندوق تكفِّي قد إيه؟ قال لي ممكن تروح كلها على 2027، قُلت ليه، ماينفعش، لازم الصندوق يكبر ويزيد.