بدلة الشواربي ونجمة الحلاق.. خالد عليش يعلق على صورة في مهرجان القاهرة عام 2007

كتب- أحمد عبدالمنعم:

علق المذيع خالد عليش، على صورة له من مهرجان القاهرة السينمائي عام 2007، وحكى ذكرياته مع المهرجان وكيف كان حضوره.

وقال عليش في منشور على صفحته الرسمية بموقع التواصل الاجتماعي "فيسبوك": "تاني واحد من ناحية اليمين ده أنا.. رابطة كرفتة عملتها في يوم كامل مكنتش عارف أربطها ولحد النهاردة مش بعرف.. بدلة جبتها من الشواربي بـ٢٧٥ جنيه وقتها".

وتابع: "الكرافتة نفسها جبتها من محل في التحرير لبني مضلعة مش عارف سمحت لنفسي ألبسها أزاي.. فارد شعري عند نجمة الحلاق في الوراق.. شغال في راديو على الإنترنت بيسمعه وقتها صحابنا".

واستطرد: "روحت أنا ومجموعة من زمايلي في الراديو تغطية مهرجان القاهرة السينمائي في ٢٠٠٧ وكان عندي شغف شديد جدًا وقتها.. عمري ما نسيت بدايتي.. أما كنت مش بروح الجامعة أيام عشان مش بعرف الحق الميكروباص من الوراق الصبح".

وأكمل: "اما جبت عربية ١٢٨ بيضا وتعطل مني دايما على طلعة الكوبري.. امي وأبويا اللي تعبو معايا عشان يعلموني ويودوني جامعة ويشجعوني وقت ما دخلت مسابقة في الراديو عشان أكون مذيع و فشلت للأسف وقتها.. مش بقول أنها كانت بداية صعبة لكن بداية أنا بتشرف بيها".

واختتم: "بتشرف بكل خطوة صغيرة ساعدتني أكون أفضل وأتعلم حاجات أكتر وأوصل لحتة أكبر عشان لسة ما عملتش حاجة".