السيسي عن الحياة السياسية: "بلاش تستعجلوا عاوزين نمشي بتأني" - فيديو

كتب – محمود مصطفى ومي مدحت:

قال الرئيس عبدالفتاح السيسي إن الحياة السياسية في مصر ليست متردية، وهناك تطور كبير بها، والتصارع فيها شهد دفعة كبيرة منذ عام 2011.

وأضاف خلال كلمته في الجلسة الأولى لفعاليات المؤتمر الوطني الخامس للشباب، الذي عقد الأربعاء بالقاهرة، أن الانتخابات الرئاسية قبل ذلك كانت عبارة عن استفتاء في مجلس الشعب، وبعد ذلك أصبح هناك انتخابات يدلي فيها الشعب بصوته.

وتابع السيسي: أحد الأحزاب في دولة معينة قال: "إن اللي بينجح هو اللي بيحكم، وكان بيأكد إن اللي بينجح بغض النظر بقى عن رضا الناس من عدمه، واللي اتخلف عن النزول، وترتب على عدم النزول بروز حزب لا يرضى عنه الناس، ما يلومش الحزب اللي نجح، ما يلومش الرئيس اللي كسب، لكن يلوم الناس اللي بخلت على نفسها وعلى بلدها تقف علشان تقول لأ أنا هحط صوتي علشان ضميري يبقى مستريح".

وأضاف: "الحياة السياسية تهدف إلى وجود كيانات قادرة على دفع الدولة للأمام وتطورها وجعلها قوية"، متابعا: "وجود ما يقرب من 8 أو 9 أحزاب في البرلمان، عمل إيجابي حتى لو مش راضيين عنه".

وتابع السيسي: "بلاش تستعجلوا وبلاش طموح جامح، عاوزين نمشي بتؤدة وتأني، وأنا سعيد بالتواصل سواء بوجود لجنة تنبثق من المجموعة المتواجدة حاليا، للتواصل مع السلطة التنفيذية، أنا معاكم لأنه في النهاية مفيش حد هيتخلد في الدنيا دي، فلو بنحب بلدنا وخايفين عليها، لازم إعداد كوادر قادرة على قيادة البلاد في ظل التحديات المحلية والإقليمية والدولية، أنا موافق على اللجنة، وهنقعد ونتكلم، لأننا في النهاية محتاجين ده".