باسم يوسف يكشف أسرارًا عن حكم الإخوان: "ما بقاش يأثر معايا"

كتب- أحمد لطفي:

كتب الإعلامي الساخر باسم يوسف، على حسابه الرسمي فيسبوك؛ تدوينه طويلة للحديث عن علاقته بجماعة الإخوان المسلمين ومطالبة البعض بمساندتهم نظرًا لكونه السبب في القضاء على التجربة الديموقراطية إبان حكم الرئيس الأسبق محمد مرسي.

وقال يوسف، في التدوينه، "نبتدي بالسطر المفضل :انت كنت السبب في القضاء على التجربة الديموقراطية بسخريتك من مرسي، لا يا حبيبي، انت فاهم الديموقراطية غلط. الديموقراطية مش منة و لا فضل من مرسي بتاعكم. الديموقراطية هي اللي ليها الفضل انه جه رئيس. و الديموقراطية دي هي اللي خلتكم تعيطوا بعد الجولة الاولى لما مرسي اللي كنتم فاكرينه حيكتسح اضطر يخش جولة تانية قدام شفيق. و فضلتم تلفوا على "رفقاء الميدان" واحد واحد و تعيطولهم و تكلموهم و تترجوهم و "النبي تعالوا مؤتمر الفيرمونت" (بعد الانتخابات ) بعد لما كنتم بتفشخوهم و بتهاجموهم في برامجكم و تشنعوا عليهم. و بسببهم مرسي كسب بواحد في المية بسبب "عاصري اللمون" اللي زقوه".

وتابع: "بسبب الديموقراطية يا حبيبي مرسي المفروض كان يتبهدل و ينتقد بادب و بقلة ادب . الديموقراطية مش بتخلص عند الصناديق. الديموقراطية بتكمل لبعد كده. اه و الديموقراطية فيها شتيمة و سخرية و تأليس عادي. كان المفروض نعمل ايه يعني؟ نسكت؟ نطبل؟ نسكت و شيوخ السلفية الامنجية بيتكلموا عن كرامات مرسي في صلاة الفجر و ازاي "نصارى مصر حيدخلوا دين الله افواجا بعد ازالة قبضة الكنيسة الحديدية" نسكت على هبل مرسي و الناس اللي مختارهم و تناقضاتهم؟ نسكت على الزبالة اللي كنا بنشوفها في قنواتكم؟ و كمان هو احنا كنا بننتكلم لوحدنا؟ انتم كان عندكم بدل القناة مواقع و صفحات و جريدة و قنوات سلفية في صفكم (الناس، الحافظ، الخليجية و غيرهم). كنتم بتطلعوا في القنوات دي و تنتهكوا حرمات الناس : تتهموا ده بالشذوذ ، ده بالكفر و ده بالعمالة. و كل ده على فكرة في ظل الديموقراطية اللي كنا كلنا عايشين فيها مش بمنة و لا فضل من مرسي بتاعكم".

وأردف: "اللي حصل بعد كده ان انتم اللي انتهكتوا الديموقراطية دي. لما مرسي قعد مع رؤساء الاحزاب و اتصور معاهم و بعدين طلع اعلان دستوري لوحده و بعت ميليشياته للمحكمة الدستورية العليا و حاصرها ووقفت الميليشيات هناك تهتف للداخلية اللي وقفت و ما عملتش حاجة.. فاكرين؟ فاكرين و لا نفكركم؟".

وأكد أن "موضوع بقى ان البرنامج ما حدش قربله وقت مرسي: يا راجل؟ طب هو انا رحت النائب العام اتفسح؟ ست ساعات استجواب و كفالة و علي قنديل(اللي استضفته في الحلقة) نفس الموضوع. طب ايه رآيكم بقى ان قبل تلاتين ستة وزير الاستثمار الاخواني بتاعكم بعت تحذير مكتوب لكل القنوات ان اي برنامج حيسخر من الرئيس حيتقفل و القناة حتتقفل بعد الانذار التاني؟ الانذار ده اتبعت و احنا بنصور اخر حلقة قبل تلاتين ستة. يعني نيتكم كانت وسخة اصلا".

وتابع: "انتم بس لما تفتكروا انكم ديموقراطيين افتكروا الوسخ اللي انت محتمين عنده في تركيا و وساخته مع الصحفيين و اي حد بيعارضه حتى لو مالوش علاقة بالجيش و الانقلاب اللي حصل. دي عينة من ديموقراطيتكم لما تركبوا. و مش غريب على وساختكم على مر العصور و مادام جبنا سيرته فاردوغان ده على فكرة في حزب الناتو اللي فشخ ليبيا و سوريا و العراق تحت قيادة امريكا اللي مدلعة اسرائيل فبلاش مزايدة في المنطقة دي؟ ماشي؟ بصوا علـى التعاون الامني بينه و بين اسرائيل، مش تبرروله برضه زيكم زي الل بيبرر للسيسي".

واستكمل: " ما تقرفوناش بموضوع اننا اللي اسقطنا مرسي. هو اللي اسقط نفسه بغباوته و بطمع جماعتكم و بخيانة السلفيين ليكم؛ قياداتكم اللي فضلوا يسخنوا الناس في رابعة هربوا على قطر و تركيا من اول قلم و فضلوا يسخنوا من بره برضة و مش هاممهم اي حد يموت. اللي حصل في رابعة انتم تتحملوا جزء منه. مئات الضحايا صدقوا القيادات بتوعكم اللي ولعوا الدنيا و هيجوا الناس و هربوا، و بعدين قاعدين بره قالبين رابعة للطمية كربلائية و بيزايدوا بيها على الكل مع ان المفروض انهم يراجعوا اللي عملوه كقيادات سياسية. و لو ناسيين افتكروا اللافتات اللي قلبت انجليزي بتطالب امريكا بالتدخل".

وعن سلسلة الاتهامات التي دائما توجه إليه، قال "يوسف"، "انا خلاص ما بقاش يأثر معايا، ما بقاش يحوق، الجتة نحست و الابتكارات خلصت. لو برنامج ساخر بيقدمه "اراجوز" اسقط رئيسكم يبقى رئيسكم تافه و جماعتكم تافهة".