الكاتدرائية تهتف ''بنحبك يا سيسي'' والرئيس يرد: ''وأنا كمان بس كده البابا هيزعل''

كتب - محمد الحكيم:

هتف حضور الكاتدرائية المرقسية بالعباسية، خلال كلمة الرئيس عبد الفتاح السيسي في الاحتفال بأعياد الميلاد، مساء اليوم الثلاثاء، ''بنحبك يا سيسي''، ما رد عليه الرئيس مازحًا: ''وأنا كمان بحبكم ومتشكر.. بس كده قداسة البابا هيزعل''.

وقال السيسي، خلال كلمته لتهنئة البابا والأقباط: ''كان ضروري إني أجيلكم وأقولكم كل سنة وأنتم طيبين، وأتمنى أن مكنش قطعت عليكم الصلوات''.

وكانت صلوات القداس قطعت بوصول السيسي الكتدرائية، ونزل البابا من أعلى هيكل الكنيسة إلى الرئيس الذي ألقى كلمته وسط تصفيق الأقباط وتهليلهم بحضوره، قائلاً: ''مهم إن الدنيا تشوف المصريين، مينفعش حد يقول لحد غير كده إحنا كلنا مصريين، بنسطر للعالم معنى ونفتح طاقة أمل ونور حقيقية، ومصر علمت على آلاف السنين الحضارة للعالم وقادرين نعلم الإنسانية مرة تانية تنطلق من مصر إحنا المصريين بس، إن شاء الله هنبني بلدنا مع بعض ونساع بعض وهنحب بعض كويس ونحب بعض بجد علشان الناس تشوف.. مرة تانية عام سعيد عليكم وعلى المصريين كلهم، وكل عام وأنتم طيبين جميعا يا قداسة البابا.. ومتشكرين ومش هضيع وقت أكتر من كده''.

وبهذه الزيارة، فإن الرئيس السيسي هو أول رئيس للجمهورية يحضر قدّاس عيد الميلاد، وسبق أن حضر العام الماضي المستشار عدلي منصور رئيس الجمهورية السابق، للكاتدرائية لكنها كانت زيارة للتهنئة فقط.

لمتابعة أهم وأحدث الأخبار اشترك الآن في خدمة مصراوي للرسائل القصيرة للاشتراك ...اضغط هنا