النجار: "اليمن أنضمت لاسطورة مانبقاش زي سوريا والعراق"

كتبت-عبير القاضي:

قال مصطفي النجار البرلماني السابق، إن اليمن "انضمت إلى أسطورة عشان ما نبقاش زى سوريا والعراق وليبيا حد فكر هما ليه بقوا كدا ؟ حد فكر اننا ممكن نكون فى وضع أخطر منهم وان مأساتنا هتبقى مختلفة لكنها هتبقى مأساة يتقال عليها النموذج المصرى أو المأساة المصرية".

وأضاف النجار عبر حسابه الشخصي على موقع التواصل الاجتماعي"فيسبوك" اليوم الاثنين، "أن الرابط بين كل مآسى العرب وجود استبداد وقمع وانتهاكات حقوق انسان واقصاء المعارضين ومحاربة الشباب وسيادة الجهل والخرافة باسم الوطنية وتوظيف الدين لصالح السلطة مع إعلام موالى للسلطة ومطبل لها ومدلس على الجماهير وبالتالى بتتولد الكراهية وتتزرع فى النفوس وبيغذيها القهر والقمع والظلم وبيتصاعد لدرجة أن الناس مش بيبقى فارق معاها حاجة ومعندهاش حاجة تبكى عليها ولا حاجة خايفة تخسرها".

وتابع قائلا :"ركزوا وشوفوا احنا واقفين فين واوعى حد يتخيل ان مظاهر القوة اللى بيتخيلها هتحميه هتفضل باقية، بالعكس دى ممكن تبقى سبب نهايته ومأساة البلد كلها، الدروس حوالينا واضحة بس فى ناس بتفهمها بالعكس وبيعتقدوا ان البطش والدراع هما اللى هيحموا البلد، والأسوأ منهم المعتوهين اللى بيطبلوا ليهم وفاكرين انهم هيبقوا فى أمان مع الاستبداد وقهر الناس واهدار كرامتهم".

وأكد النجار " هنفضل نقول اللى يرضى ضميرنا عشان احنا خايفين على البلد دى وعارفين انها مش ملك للى بيحكموها ولا عزبة ولا وسية لذيولهم وأتباعهم، ربنا يحمى مصر وشعبها من الغباء والعناد، مصر فى خطر ".

لمتابعة أهم وأحدث الأخبار اشترك الآن في خدمة مصراوي للرسائل القصيرة.. للاشتراك...اضغط هنا