" الناس بتخزن الدولار وترجع تشتكي".. يوسف الحسيني: "العملات الأجنبية مكانها البنوك مش البيوت"

كتب – معتز عباس:

انتقد الإعلامي يوسف الحسيني، قيام الكثير من الأشخاص بشراء الدولار وتخزينه وتحويل مدخراتهم بالجنيه إلى دولار أوذهب، من أجل المضاربة على الأسعار، معقبًا: "اي محاولة للاحتفاظ بالدولار هتضرك بشكل مباشر على المدى القصير أو الطويل، واللي حول دولارات وضارب على أسعار الذهب الفترة الماضية، النهاردة بيقولوا اية الاسعار اللي زادت والدنيا غليت، لا دا انتا بسبب سلوكك الفردي ساهمت في هذا الأمر".

وقال "الحسيني"، في برنامجه "التاسعة"، المذاع عبر فضائية "الأولى المصرية"، اليوم الإثنين: "أنا قلت الدولار مش هيزيد عن 20 جنيه في 2017 وفعلا وصل لـ19 و 15.5 جنيه لكن موصلش لـ20 جنيه، يوسف قال في سبتمبر 2021 روحوا البنوك بيعوا الدولار اللي معاكم"، متساءلًا: "هو المفترض الدولار يتخزن تحت البلاط وفي الدولاب وتحرم المؤسسة المصرفية منه، وبعدين تلاقي المستوردين عندهم أزمة وعايزين دولار".

وأضاف: "عشان الناس مخبية الدولارات بيحصل ندرة في هذه العملة الأجنبية وبعدين يحصل زيادة في السوق الموازية "السوداء"، ولما سعره يزيد هتبقى مضغوط وبعدين بترجع تشتكي وتغني ظلموه، دا غير أنه ظهرت في السوق دولارات مزورة من كتر النهم على شراء الدولار".

وأكد، قائلًا: "العملات الاجنبية مكانها البنوك مش البيوت وهذا الأمر لحماية الاقتصاد، وأنا بقولكم اهو السوق السوداء هتضرب يعني هتضرب ونزلت أسعاره شوفوا الدولار بقى بكام دلوقتي".