في أول ظهور بعد وفاة والده.. شريف عامر: "أنا على الهواء وأتمنى تكون راضي"

كتب- محمد أبوالمجد:

أكد الإعلامي شريف عامر، أنه يكون قلقًا بعد عودته للبرنامج كل عام من الإجازة السنوية، قائلًا: "لغاية دلوقتي مش قادر أخبي أو أداري انفعالي وبكون راجع قلقان ومتوتر، ولكن هذه المرة الأمر أصعب شوية".

وقال "عامر" في خلال تقديمه لبرنامجه "يحدث في مصر" على فضائية "إم بي سي مصر" اليوم الثلاثاء: "أول درس أخدته في حياتي المهنية كان على يد محمد سليمان، والغريب واللافت إنه قالنا وقتها لو السيد أبوك أو أمك ماتوا ومبلغتناش يبقوا مماتوش، يعني تيجي الهواء، وأنا النهارده معاكم على الهواء وهما مش موجودين".

وتابع: "إمبارح مر 40 يوم بالظبط على وفاة والدي وكنت متصور إني هبدأ الحلقة بشكل مختلف، لكن الهواء لازم يشتغل والحياة لازم تستمر، وأرجو بس أن الواحد يبقى عارف يستمر بشغله بالشكل الذي تتوقعوه وتنتظروه"، مؤكدًا: "الأصعب بعد الهواء بالنسبة لي لأن والدي كان رجل قلوق جدًا وكان يطلبي عقب نزول تتر البرنامج ويقولي إنت فين وكان يقلب الدنيا لو مردتش".

وأردف: "هذه المكالمة لن تتم النهارده لكن أتمنى إنه يكون راضي باللي بقدمه وربنا يرحم الجميع وأسف إني فتحت الموضوع كل دا".