عمرو أديب عن إيقاف استيراد بعض السلع: "شكلنا وحش وفي عرض اي حد يستثمر"

كتب - معتز عباس:

عقب الإعلامي عمرو أديب على قرار وزارة التجارة والصناعة بإيقاف الاستيراد من عدد من الشركات المصدرة لمصر وذلك بعد أن نشرت هيئة الرقابة على الصادرات والواردات قائمة بهذه الشركات على موقعها الإلكتروني.

وقال "أديب"، في برنامج "الحكاية"، المذاع عبر فضائية "ام بي سي مصر 2"، اليوم الأحد، إن الدولة تعيش في وقت صعب وحساس والأمر لا يحتمل، ويجب الحفاظ على علاقتنا التجارية الخارجية والاستثمارات في الدولة، لافتًا إلى أن تلك الشركات والمصانع تعمل لديها عمالة مصرية وتدفع جمارك، مرادفًا: "أغلبية الشركات التي يتم التعامل معها في هذا الامر زاي المراعي ويونيليفر لهما تواجد قوي في مصر.. دول مش بتوع شهادات جودة وأيزو دول يعلموا الجودة".

وأضاف: "ولازم نفرق في التعامل، الشركات لديها استثمارات في مصر من سنين، وبرة مصر اي شركة بيحصل عليها اي نوع من أنواع او العقوبات حكومتها بتدخل.. لو انتا فاكر الشركة الاجنبية ملهاش ضهر لا بتروح لحكومتها لانها فاتحه في دولتها باب أكل عيش، واحنا ونتكلم عن اسامي شركات عملاقة.. لكن لو مش عايز استيراد قرر انك تنفصل عن منظومة التجارة الدولية".

وأكمل: "مصر عبارة عن سوق فيه 100 مليون والشركات الكبرى تحترم هذا الامر، والمسألة مش قصة منتجات مستوردة لأ هي اكبر من كدا، الإجراءات البيروقراطية اللي بنعملها شكلها وحش بالنسبة لنا وشكل البلد مش كويس".

وتابع: "اية لازمة الكلام دا دلوقتي احنا في عرض اي حد يستثمر في مصر، هو في دولة بتعرف تعمل كدا يا جماعة وهو في حد بيعرف يعيش لوحده، هو الراجل دا وهو داخل مصر بيدفع (بسلة) دا بيدفع جمارك وضرايب، اي دولة في العالم لازم يبقى عندها بضاعة مستوردة مش عايزين قول له وحد يجي تاني".

واستطرد، قائلًا: "هو الكام ورقة دول فارقين مع الدولة في اية؟!، هو دا وقته في الوقت اللي احنا فيه العالم بيقول أن لازم الحياة تمشي طب استنى شوية، أنا عارف اللي بقوله هيزعل ناس كتير، لكن يجب مراجعة هذه القرارات وطالما عايزين توقفوا يبقى تدفعوا التمن".