صاحب فكرة الشبكة الفضة: "أهل خطيبتي بيشتروا راجل".. وخطيبته ترد: "أهم حاجة السترة والسند"

كتب- معتز عباس:

استضاف الإعلامي شريف عامر، كريم وغادة أول عريس وعروسة استغنوا عن الزواج بالشبكة الذهب، وفضلوا الشبكة الفضة، حيث أثار الأمر حالة من الجدل عبر مواقع التواصل الاجتماعي.

وقال "كريم" في لقائه ببرنامج "يحدث في مصر" المذاع على فضائية "إم بي سي مصر"، اليوم الأربعاء: "أنا كنت بقلب على الفيس لقيت صفحة عاملة عرض شبكة من الفضة بدلا من الذهب بـ1800 جنيه".

وأضاف "الفكرة عجبتني وعرضت الفكرة على غادة ولم تعترض وبعدها وقالتلي أنا معنديش مانع وأنا شرياك"، متابعًا: "لما عرضت الفكرة على والدة غادة وأهلها، وقعدت مع مامتها كانوا متشددين شوية وقعدت معاهم مرة وعملت اللي عليا وادوني أسبوع ويردوا عليا بقبول الفضة".

وتابع: "لقيتهم بيكلموني وأنهم وافقوا على الخطوا وأنهم بيشتروا راجل".

من جهتها علقت غادة جمال، العروس، في لقائها، أنا قبلت بالفضة، لأني بشتري راجل بستند عليه، والفضة والذهب دا مجرد لون، والحياة بقت صعبة وأهم حاجة السترة والواحدة تعيش ولازم نحس بالشباب وظروفهم والحياة والمعيشة بقيت صعبة بس السترة بالدنيا كلها، وربنا يجعله زوج صالح وهو بيصلي وهيتقي ربنا فيا".

وتابعت "أنا بشجع أي بنت تعمل كده تتستر وتستند على راجل بجد وأنا وافقت بكريم علشان هو متدين ويعرف ربنا".