عمرو أديب يستنكر حملات عدم تهنئة المسيحيين: "اللي اتعمل مع صلاح وشيخ الأزهر غير معقول"

كتب- محمد أبوالمجد:

قال الإعلامي عمرو أديب: "في حاجات بقالي 30 سنة بعملها، إني بلاقي ناس أنبرت وتقول لا نتشبه بالمسيحيين ولا نعيد عليهم في أعيادهم، ولكن كل سنة وأنتم طيبين وإخواتنا المسيحيين الغربين وفي يناير نهنئ إخواتنا المسيحيين الشرقيين، وليذهب كل من يقول ذلك للمكان الذي يرغب فيه".

واستنكر "أديب" خلال تقديمه لبرنامجه "الحكاية" على فضائية "إم بي سي مصر" مساء الأحد، عمل هاشتاجات تدعو إلى عدم تهنئة المسيحيين بعيد الميلاد، قائلًا: "يعني ايه أنا لا أهنئ مسيحي دا سيدنا عيسى عليه السلام، دا عيد مولد السيد المسيح، هل محتاج أقعد اتكلم عن الأمر كثيرًا"، موضحًا: "اللي اتعمل في شخصيات عامة في مصر لا يمكن لأحد أن يقبله أو يفهمه، وخاصة موضوع شجرة الكريسماس، دي مش موضوع أو رمز ديني معين شجرة ظهرت في القرن الـ 16 وشيء مفيهوش حرمانية لك كمسلم".

وتابع: "اللي اتعمل في محمد صلاح أو الإمام الأكبر الدكتور أحمد الطيب، شيخ الأزهر الشريف، لايمكن أن يقبله أو يفهمه أحد، دا في ناس بتزايد على شيخ الأزهر، هل ده معقول يا جماعة؟ ده حتى الكلمة الطيبة صدقة".

وأردف: "دا في واحد كاتب لشيخ الأزهر هل حضرتك درست أو قرأت آية في الإسلام تقولنا أن تهنئة المسيحيين حلال، دا بيقول لشيخ الأزهر، شيخ الأزهر مقراش آية، عشان كده لما بكلمكم عن اللي حصل في طالبان وباكستان ناس تقولي أنت مالك، أنا مالي إزاي؟".