"كنت بموت وروحي رجعتلي".. والدة طفل المحل تكشف كواليس تحرير نجلها

كتب- محمد أبوالمجد:

كشفت إيمان السيد والدة طفل المحلة، كواليس اختطاف وتحرير طفلها، قائلة: "لسه مصدومة أكيد والحادثة راجاني طبعًا"، مضيفة: "زياد كان بيقولي أنه نايم على مرتبة في الأرض لما اتخطف، ولما رجع البيت منمناش خالص والحمدلله رجع البيت".

وأضافت "السيد" في حوارها لبرنامج "يحدث في مصر" على فضائية "إم بي سي مصر" اليوم الثلاثاء: "عندي 3 أولاد، وزياد أكبر أبنائها، ومكنتش مصدقة لما زياد رجعلي"، موضحة: "كنت في المحل لما اتخطف مني وزياد حاول يقاوم بس معرفش، وفضلت أصرخ لما العربية مشيت ووالده نزل على صوت صرخي".

وتابعت: " لما زوجي نزل راجع الكاميرات وأتصل بالشرطة على طول، والساعات اللي فاتت مرت عليا صعبة جدًا، وكنت بموت والله بمعنى الكلمة، والحمدلله روحي اتردت ليا"، موضحة: "مكناش نعرف الخاطفين ومفيش أي علاقة بيهم خالص".

وأردفت، والد طفل المحلة: "الدنيا اتقلبت لما بلغنا الشرطة واخدوا باباه معرفش عنه حاجة عشان لو حاول يجيله اي مكالمة يتبعوها وكنت مستنية اي خبر عنه من زوجي وكان بيقولي اطمني هيرجع ان شاء الله، وكان جنبي كل أهلي واصحابي والمحلة كلها كانت موجودة عند البيت بتحتفل برجوعه".

وأوضحت: "محاولتش اتكلم مع ابني لأنها حاجه مش كويسة تتعرف لأنهم كانوا بيهددوه انهم هيدبحوه وهيرموه ونفسيته مدمرة وياريت كلنا ننسى الموضوع"، مؤكدة: "زياد ابني في 6 ابتدائي ونفسيته مدمرة خالص وكان بيتكلم شكل بس لكن نفسيته أكيد مدمرة، وهو من النوع اللي بيتخاف من أقل حاجة، يبان أنه جامد وبيعرف يتعامل بس هو أقل شيء بيرعبه".