ضحية "تحرش العمرانية": "لما ضربني الناس موقفتش جنبي.. وكنت مرعوبة أنزل الشارع"

كتب- معتز عباس:

كشفت ليلى ضحية التحرش، والمعروفة باسم "فتاة العمرانية" تفاصيل تعرضها لواقعة التحرش في أثناء عودتها من الدرس، قائلة: "كنت راجعة من الدرس وأنا في ثانوية عامة وأثناء سيري في الشارع فوجئت بأحدهم يسير بجواري بسيارته، واعتدى عليا لفظيًا بألفاظ خادشة للحياء.. قالي كلام فظيع مش كويس.. وحاولت تجاوزه وإكمال سيري".

وأضافت "ليلى"، في مداخلة هاتفية ببرنامج "كلمة أخيرة"، المذاع على فضائية "أون إي"، اليوم الأحد، قائلة: "عندما حاولت سؤاله بعد سبي وقلتله حضرتك بتكلمنى أنا؟

فوجئت بيه بيضربني بالقلم على وشي"، متابعة: "كنت خايفة اوي منه وقررت مانزلش الشارع تاني وقتها، صحيح تعرضت لمعاكسات قبل كده بس المرة دي كانت سباب وشتايم وضرب على وشي، ووقتها أصبت بالصدمة والذهول إزاي أتضرب؟ وماعرفتش أتصرف؟ لكن صاحبتي ساعدتني، وأخدت رقم العربية".

وأكملت: "الناس في الشارع سألوه أنت بتعمل كده ليه؟ وهدوه ومشوه ورغم إني بنت المنطقة بس ما حدش وقف جنبي... بعد ما صاحبتي صورت رقم العربية قلت لماما، ونزلت أعمل محضر في القسم بتشجيع أمي وأبويا وأصحابي".

وأكدت أنها كانت مرعوبة من الواقعة: "قلت لنفسي لو الشخص ده ما تقبضش عليه هيكرر فعلته معايا ومع بنات تانية وأكيد عملها قبل كدا".

وحول مشاعرها بعد القبض عليه، قالت: "ماكنتش متخيلة يتقبض عليه بسرعة وبشكر كل اللي دعمني ووقف جنبي وبشكر كل الناس وأصحابي وأهلي والشرطة".

ووجهت رسالة للفتيات اللاتي يتعرضن للتحرش قائلة: "متسكتيش هيتجاب حقك ومتخافيش كنت الأول زمان بخاف أتكلم في مثل هذه المواقف، لكن المرة دي اتحركت وما قدرتش أسكت بعد ما مد إيده علي وماتوقعتش ده أبداً".