تامر أمين عن انتقال رمضان صبحي لـ"بيراميدز": "اللاعيبة بقت سماسرة"

كتب- محمد خميس:

علق الإعلامي تامر أمين، على انتقال اللاعب رمضان صبحي لنادي بيراميدز، قائلًا: "عارف إن الخبر صدمة وأنا اتصدمت وزعلت لأني أهلاوي حتى النخاع"، مضيفًا: "من زمان وفهمت إن لاعيبة الكورة اتغيروا وفكرة الانتماء والفانلة الحمراء وابن النادي مبقتش، واللاعيبة بقت سماسرة وانتمائها للي يدفع، وولائهم وإخلاصهم ومهاراتها وشطارتها للي يكسب المزاد والقصة مبقتش نادي بقت فلوس وتأمين للمستقبل والملايين اللي هعرف أطلع بيها من الكورة مش قصة إني مخلص للأهلي أو لأي نادي".

وأضاف "أمين" في خلال تقديمه لبرنامجه "آخر النهار" على فضائية "النهار" اليوم الأربعاء: "الكلام دا أنسوه دا كان في الماضي وقت الهواية وقت الخطيب وحسن شحاتة وقت ما كانوا بياخدوا ملاليم وإخلاصهم لأنديتهم اللي كان يستحق الملايين، وعشان كده جمهور الكورة شايلهم على كتافه مش ناسيهم لحد النهاردة".

وتابع: "لاعبي هذا الجيل أوعوا حد فيهم يضحك علينا باسم الفانلة والنادي والكلام دا كله أوعوا تصدقوه، والأهلي عمره ما هيقف على أحد وعمره ما خسر حد بل إن اللاعبين هما اللي خسروا الأهلي، وافتكروا عبدالله السعيد اللي عمل نفس الحكاية"، موضحًا: "كلامي موجه لجمهور الكورة أوعوا تتخدعوا تاني بالحركات اللي بيعملوها اللاعيبة".