الأولى على الإعدادية بكفر الشيخ عن تبني الرئيس السيسي لها: "بشكره على دعمه لأنه أبونا كلنا"
تطبيق مصراوي
لرؤيــــه أصدق للأحــــداث
كتب- محمد أبوالمجد:
أعربت الطالبة منة الله عماد، الأولى على شهادة الإعدادية بمحافظة كفر الشيخ، عن سعادتها بتوجيهات الرئيس عبد الفتاح السيسي، بتبني تعليمها، وهو ما أعلنته الأكاديمية الوطنية للتدريب ومؤسسة حياة كريمة في بيان مشترك بينهما، قائلًة: "أشكر الرئيس السيسي على دعمه واهتمامه بيا ويارب أكون عند حسن ظنه وأفيد البلد في يوم من الأيام لأنه أبونا كلنا".
وقالت "منة" في مداخلة هاتفية لبرنامج "حضرة المواطن" على فضائية "الحدث اليوم" مساء الأحد: "أنا حاليًا متواجدة في القاهرة وأتمنى أكمل تعليمي هنا مش في كفر الشيخ"، موضحة: "حلمي أبقى دكتورة جلدية لأني بحب الدكتور هاني الناظر ونفسي أبقى زيه إن شاء الله، وبقول لأي حد في سني أو حد عنده امتحانات، إن أهم حاجه يكون عندك إرادة وصبر عشان توصل لحلمك وكل واحد على قد اللي عمله هيلاقي".
وتابعت: "أتمنى يتم دعمي في التعليم وأتمنى أني أرد الجميل لأمي وتكون فخورة بيا وأخويا أتمنى أشوفه حاجه كبيرة ويلعب في النادي اللي هو عايزه بيشجع الأهلي".
وفي نفس السياق هنأ الدكتور هاني الناظر رئيس المعهد القومي للبحوث سابقًا، الطالبة منه الله عماد، قائلًا: "ألف مبروك يا منة ويارب يكتبها الخير ونشوفك واحدة من أفضل وأحسن الطبيبات الجلدية في مصر وسعيد إنك بتكلميني"، لترد منه: "سعيدة وفرحانة جدًا إني كلمت حضرتك لأنك مثل أعلى ليا ونفسي أكون في يوم من الأيام نص علمك"، ليقاطعها الناظر: "إن شاء الله تبقى أحسن مني كمان ".
فيما علقت السيدة إيمان عادل والدة الطالبة منه الله عماد: "الحمدلله إن منه وصلت وأثبتت للكل إنها الأولى واللي جاي كله أحسن إن شاء الله، مرينا بظروف صعبة جدًا وقدرنا نعديها، صوتي كله فرحة وأيام كتيره كنت منهارة ودلوقتي فخورة وفرحانة باستجابة الرئيس السيسي على تبنيه منه واللي جاي أحسن أن شاء الله".
وأضافت: "أهلي وقفوا جنبي ودعموني ماديًا ومعنويًا ونفسيًا وكان ليا أخ حبيبي وعمري كله كان بيقولي أفردي ضهري وأرفعي ضهرك واللي جاي إن شاء الله كله أحسن، وكنت بدعي ربنا أكرمني في أولادي، وحلمي أكمل مع أولادي وأطعلهم أحسن وبشكر الرئيس السيسي ومصر كلها على دعم بنتي".
فيديو قد يعجبك:
