رأي المواطنين في الـ"بلاك فرايدي".. خصومات خادعة وقطع أعدادها محدودة

كتب- أحمد عصام روّاي:

رصد "مصراوي" تعليقات بعض المواطنين على تخفيضات وتنظيم "الجمعة البيضاء" في "كايرو فيستيفال سيتي".

 أبدى "كريم حمدي" استياءه من الزحام والتدافع في المحلات، "للأسف الدنيا كانت زحمة والناس كانت فوق بعض، وده خلاني أبعد عن المحلات الزحمة زي "زارا" و "أتش أند إم" وأروح لمحلات أغلى شوية زي "مانجو" و "تومي" عشان أقدر أنقي براحتي، وألاقي حاجات تناسبني".

وقالت "مريم جمال"، "الدنيا مهرجلة خالص، وللأسف مفيش توفير لأعداد كتيرة من القطع بمقاساتها المختلفة، فممكن ألاقي قطعة حلوة، بس ملاقيش مقاسي، أو ألاقي حاجات بواقي والجودة بتاعتها وحشة من كتر البهدلة اللي شافتها طول اليوم".

 وعن رأيها في قيمة الخصومات، قالت "مارتينا شريف"، "أنا معرفتش أشتري أي حاجة لحد دلوقتي، لإن الحاجة مش بترخص، يعني بيغلوا الأسعار قبل التخفيضات بيوم أو أتنين، ولما يخفضوا الأسعار تكون أعلى سنة من السعر الأصلي".

واستكملت "مارتينا" حديثها، "ممكن تلاقي تخفيض 50% على حاجة سعرها عالي أوي، فاللي هو الحاجة بعد التخفيض سعرها غالي وصعب تشتريها برضه".

 قالت "رضوى"، "على الرغم من أن دي تاني مرة ليا أنزل أشتري في البلاك فراي داي، إلا أن السنة دي أحسن من السنة اللي فاتت شوية من ناحية التنظيم، والخصومات، أه أنا لسه مش حاساة زي البلاك فراي داي في بلاد بره، بس حاسة أنه أتحسن عن السنة اللي فاتت، وممكن مع الوقت المستوى يتطور، والعروض الوهمية تقل، ونلاقي حاجات تناسبنا نشتريها، بدل مانا مجبتش غير "سلوبيت" بس في 4 ساعات".