أهم أسباب فشل الكيك

ناس كتير بتشتكى من ان الكيك بيطلع مش مظبوط, هنحاول فى المقال ده نوضح كل المشاكل اللى بتؤدى لفشل الكيك علشان نتجنبها.
1- الكيكة انكمشت

سبب انكماش الكيكة هو درجة الحرارة العالية أو تركها فى الفرن لوقت أطول من اللازم, الالتزام بوقت الطهى ودرجة الحرارة مهم جدا من أجل نجاح الكيكة.
2- الكيكة انكمشت بعد خروجها من الفرن

ده معناه ان وقت الطهى كان غير كافى أو ان الكيكة تم تبريدها فجأة, يعنى خرجت من الفرن على الثلاجة مثلا.
3- بقع بيضاء على سطح الكيكة

ده معناه ان السكر مدابش كويس, لازم نراعى اضافة السكر بالتدريج للبيض المخفوق مع خفقه كويس جدا لحد ما يدوب تماما.
4- الكيكة منفشتش وجافة

ده معناه انه تم خلط الدقيق بالسائل بشكل غلط, لازم ان الدقيق يكون منخول كويس والتقليب بحركات دائرية أثناء الخلط علشان نتفادى المشكلة دى.
5- سطح الكيكة باهت أو الكيكة ناشفة

ده بيحدث بسبب الخبز على درجة حرارة أعلى من اللازم, أو عدم وضع الصينية فى منتصف الفرن, وممكن كمان يكون القالب المستخدم للخبز غير مناسب.
6- الكيكة تهبط من المنتصف

ده سببه ان القالب المستخدم صغير على كمية العجين والنتيجة بتكون ارتفاع الكيكة بسرعة ثم هبوطها من المنتصف, والسبب التانى ان ممكن يكون باب الفرن اتفتح أثناء الخبز, مهم جدا منفتحش باب الفرن لأى سبب أثناء الخبز حتى لا يفقد الفرن درجة حرارته وتهبط الكيكة.