شادي شامل: "والدي كان أب شديد وطول عمري ملتزم بالصلاة"

كتبت- منى الموجي:

قال الفنان شادي شامل إنه تعلم الكثير خلال الفترة التي عاش فيها بمفرده، وأصبح أقوى، وكان وقتها تقريبا عمره 19 عاما، واصفا الوحدة بـ"لذيذة جدا".

ونفى في حواره مع المذيعة أميرة بدر في برنامج "خلاصة الكلام" المعروض على قناة النهار أن يكون ارتكب خطأ يصفه بالكبير في تلك الفترة "طول عمري فيه سقف للغلط، بنات يعني؟ أكيد عرفت الدنيا كلها، لكن المخدرات عمري ما جربتها، بالنسبة للموضوع ده كان ابتعادي عنه من عند ربنا لأن في فترة المراهقة كنت بحب الموسيقى، والمخدرات بتاعتي كانت المزيكا، منجرفتش لأي حاجة يمكن شربت سجاير مؤخرًا من كام سنة".

وأشار إلى أن والده كان أبا شديدا وصارما جدا "مكانش بيمد إيديه، نادرا جدا، وكان صارم في أمور أنه لا يمكن أقوله انت ولازم أقول حضرتك ولازم أبوس إيديه ومينفعش أبدأ أكل على السفرة غير لما هو يجي ومينفعش أقوم غير لما يقوم، ولازم أغسل طبقي، وبشكره دلوقتي على الشدة دي، اللي عمله صح، وحنية الدنيا كانت فيه، لما كبرت بقينا أصحاب".

وتابع شادي "بعامل أولادي بطريقة معدلة شوية، تخاف مني وتهابني بس من النظرة تفهم، فيه تربية جديدة، بعيدا عن الضرب فيه احترام".

وعاد للحديث عن والده، وكيف كان يتعامل معه في مسألة الالتزام بالأمور الدينية، موضحا "كان بيقولي صلي وأنا طول عمري ملتزم بالصلاة، ساعات كنت بقصر غصب عن الواحد، ودلوقتي ممكن يكون التقصير إني بصلي الفروض اللي مصلتهاش قبل ما أنام. وأمي علمتني حاجة حلوة قوي وهي الاستغفار بقعد استغفر كتير جدا".

جدير بالذكر أن شادي شامل مغني وملحن وممثل، ظهر للجمهور لأول مرة من خلال مسابقة لاختيار موهبة شابة لأداء شخصية المطرب الكبير عبدالحليم حافظ في مسلسل "العندليب – حكاية شعب" وفاز ولعب دور البطولة في العمل، الذي شارك فيه: عبلة كامل، كمال أبو رية، لقاء الخميسي، محمد الشقنقيري، هيدي كرم، أحمد فلوكس، حلمي فودة، مفيد عاشور، مجدي كامل، طارق لطفي، دينا.