عايدة رياض متأثرة بسبب رحيل أخيها: "أوحش حاجة في الدنيا المرض"

تأثرت الفنانة عايدة رياض أثناء حديثها عن أخيها الراحل وفترة مرضه بسرطان الدم وكشفت عن تفاصيل مرضه.

وقالت خلال لقائها ببرنامج واحد من الناس مع الإعلامي عمرو الليثي المذاع عبر قناة الحياة: " كان عنده كانسر في الدم وكان منفصل عن مراته وبنته 10 أشهر جابها عندي وعملنا عملية زرع نخاع وقعد حوالي 45 يوم أو شهرين نشوفه كده من الإزاز كانت حاجة أصعب من مرضي بكتير بقى وبعدين قعد 6 أشهر في البيت عشان يرجع كما يجب والحمدلله قعد سنة وكنت ملبوخة معاه بعمل عصاير فريش وأكل لغاية ما بقى جميل ووقف على رجله الحمدلله".

وأضافت: "وابتدى يرجع شغله.. ومن 3 سنين رجع عليه العيا تاني جامد قوي والله يرحمه ومايا بنته كانت معايا بس بعد ما توفى من سنتين كده مامتها خدتها بقى وبتربيها وبتجيلي خميس وجمعة وفي الإجازات".

واستكملت: "وعيشت معاها شعور الأمومة اللي اتحرمت منها وباباها كان بيحبها قوي وكان حاسس إن هو هيموت .. أوحش حاجة في الدنيا دي العيا مفيش أي حاجة تستاهل في الدنيا .. أهم حاجة الصحة والستر وربنا فعلا كان معايا بجد أنا مش بقول كلام بس أنا دايما بشكر ربنا".

يذكر أن أخر أعمال عايدة رياض مسلسل "الهرشة السابعة" بطولة أمينة خليل، علي قاسم، محمد شاهين، أسماء جلال، تأليف مريم نعوم، إخراج كريم الشناوي.

كما يُعرض للفنانة عايدة رياض حاليا على منصة شاهد VIP، مسلسل "ليه لأ 3" بطولة نيللي كريم.